దేశ పౌరులకు కేంద్ర ఇంధన మంత్రిత్వ శాఖ కీలక సూచనలు జారీ చేసింది. దేశవ్యాప్తంగా పెట్రోల్, డీజిల్ సరఫరాపై ఎలాంటి ఆందోళన అవసరం లేదని స్పష్టం చేసింది. దేశంలోని అన్ని రిటైల్ పెట్రోల్ బంక్లలో ఇంధనం సమృద్ధిగా అందుబాటులో ఉందని తెలిపింది. కాబట్టి ప్రజలు అవసరానికి మించి పెట్రోల్ లేదా డీజిల్ను నిల్వ చేసుకోవద్దని మంత్రిత్వ శాఖ హెచ్చరించింది.
ఇటీవల కొన్ని ప్రాంతాల్లో ఇంధన కొరత వస్తుందన్న అపోహలతో కొంతమంది పెద్ద మొత్తంలో పెట్రోల్, డీజిల్ కొనుగోలు చేసి నిల్వ చేసుకుంటున్నట్లు సమాచారం వస్తోందని అధికారులు పేర్కొన్నారు. ఇలా చేయడం వల్ల అవసరమైన సమయంలో ఇతరులకు ఇబ్బందులు తలెత్తే అవకాశం ఉందని తెలిపారు. అందువల్ల ప్రజలు ఎలాంటి వదంతులను నమ్మకుండా, సాధారణ అవసరాల మేరకే ఇంధనం కొనుగోలు చేయాలని సూచించారు.
అలాగే ఇంధన సరఫరా సమయంలో భద్రతా మార్గదర్శకాలను తప్పనిసరిగా పాటించాలని సూచించారు. పెట్రోల్, డీజిల్ వంటి దహన పదార్థాలను ఇళ్లలో లేదా అనుమతి లేని ప్రదేశాల్లో నిల్వ చేయడం ప్రమాదకరమని హెచ్చరించారు. ఇది అగ్ని ప్రమాదాలకు దారితీసే అవకాశముందని తెలిపారు.
ఈ నియమాలను ఎవరైనా ఉల్లంఘించినట్లయితే కఠిన చర్యలు తీసుకుంటామని కేంద్ర ఇంధన మంత్రిత్వ శాఖ స్పష్టం చేసింది. ప్రజలు భయపడకుండా, ప్రభుత్వ సూచనలను పాటిస్తూ సహకరించాలని అధికారులు కోరుతున్నారు.
Also Read:కాంగ్రెస్పై మోదీ తీవ్ర విమర్శలు