UPI MDR వాయిదా..పేటీఎంషేర్ల పతనం

UPI లావాదేవీలపై మర్చంట్ డిస్కౌంట్ రేట్ (MDR) అమలు వాయిదా పడే అవకాశం ఉందన్న వార్తల నేపథ్యంలో పేటీఎం, వన్ మోబిక్విక్, పైన్ ల్యాబ్స్ షేర్లు భారీగా నష్టపోయాయి. అక్టోబర్ 15 నుంచి అమలు చేయాల్సిన ప్రతిపాదిత MDR విధానాన్ని పండుగల సీజన్ తర్వాతకు లేదా వచ్చే ఏడాది ప్రారంభానికి వాయిదా వేయాలని వ్యాపార సంఘాలు కోరినట్లు సమాచారం. దీనిపై నేషనల్ పేమెంట్స్ కార్పొరేషన్ ఆఫ్ ఇండియా (NPCI) ఇంకా తుది నిర్ణయం తీసుకోలేదు.

వన్ 97 కమ్యూనికేషన్స్ (పేటీఎం) షేరు ఒక దశలో 10 శాతం వరకు పడిపోయి రూ.1,560.60కి చేరింది. వన్ మోబిక్విక్ సిస్టమ్స్ షేరు 8.43 శాతం వరకు క్షీణించి రూ.234.40కి చేరగా.. పైన్ ల్యాబ్స్ షేరు 4.11 శాతం నష్టపోయి రూ.170.25కి పడిపోయింది.

ప్రతిపాదిత MDR విధానం అక్టోబర్ 15 నుంచి అమల్లోకి రావాల్సి ఉంది. దీని ప్రకారం రూ.2,000కు మించిన కొన్ని పర్సన్-టు-మర్చంట్ UPI లావాదేవీలపై MDR విధించే ప్రతిపాదన ఉంది. ఈ ఛార్జీని వినియోగదారుల నుంచి కాకుండా వ్యాపారుల నుంచి వసూలు చేయాలని నిర్ణయించారు.

అయితే పండుగల సీజన్ ముగిసే వరకు లేదా వచ్చే ఏడాది ప్రారంభం వరకు అమలును వాయిదా వేయాలని వ్యాపార సంఘాలు కోరినట్లు సమాచారం. ఈ ప్రతిపాదనపై NPCI సంబంధిత వర్గాలతో చర్చలు జరుపుతోంది. ఇంకా తుది నిర్ణయం తీసుకోలేదు.

Also Read:దుబాయ్‌ బతుకమ్మ వేడుకలకు బీఆర్‌ఎస్‌ బృందం

UPI MDR విధానం అమల్లోకి వస్తే డిజిటల్ పేమెంట్ సంస్థలకు కొత్త ఆదాయ మార్గం ఏర్పడుతుందని మార్కెట్ వర్గాలు భావించాయి. ఈ నేపథ్యంలో పేటీఎం, మోబిక్విక్ వంటి కంపెనీల షేర్లపై గతంలో సానుకూల ప్రభావం కనిపించింది. ఇప్పుడు MDR అమలు ఆలస్యమయ్యే అవకాశాలు రావడంతో అదనపు ఆదాయం ఎప్పుడు వస్తుందనే అంచనాలు కూడా వెనక్కి వెళ్లే అవకాశం ఉందని మార్కెట్ విశ్లేషణలు చెబుతున్నాయి.

అక్టోబర్ 8 ఉదయం 10:15 గంటల సమయంలో పేటీఎం షేరు 5.15 శాతం నష్టంతో రూ.1,644.70 వద్ద ట్రేడవుతోంది. వన్ మోబిక్విక్ 6.58 శాతం పడిపోయి రూ.239.15 వద్ద ఉండగా.. పైన్ ల్యాబ్స్ 2.93 శాతం క్షీణించి రూ.172.35 వద్ద ట్రేడైంది.అయితే పేటీఎం షేరు గత నెలలో సుమారు 4.25 శాతం నష్టపోయినప్పటికీ, 2026లో ఇప్పటివరకు దాదాపు 24 శాతం లాభంలో ఉంది. మరోవైపు మోబిక్విక్ షేరు గత నెలలో 22.74 శాతం, గత వారంలోనే 21 శాతానికి పైగా పెరిగింది.