లక్ష్మీకళ్యాణం సినిమాతో అందాల చందమామ కాజల్ అగర్వాల్ తెలుగులో అడుగు పెట్టింది. తర్వాత కృష్ణవంశీ చందమామ సినిమా కాజల్ జాతకాన్ని మార్చేసింది. హీరోయిన్ కు కావల్సిన అన్ని లక్షణాలు పుష్కలంగా ఉండటంతో దశాబ్ద కాలంగా ఆమె వెనుతిగిరి చూసుకోవాల్సిన అవసరం రాలేదు. సాధారణంగా తెలుగు వాళ్లకు ఓ హీరోయిన్ బాగా నచ్చిందంటే తమిళ జనాలకు కూడా నచ్చుతుంది. దీంతో కోలీవుడ్ కూడా ఆమెకు త్వరగానే వెల్ కం చెప్పింది. ఈ పదేళ్ల కాలంలో టాలీవుడ్ – కోలీవుడ్ లలో ఎన్నో బ్లాక్ బస్టర్ హిట్లు ఆమె ఖాతాలో ఉన్నాయి.
కొత్త హీరోయిన్లు ఎందరో ఇండస్ట్రీలోకి అడుగు పెట్టినా కాజల్ కు మాత్రం ఫ్యాన్ ఫాలోయింగ్ తగ్గలేదు. దేశంలో సోషల్ మీడియాలో అత్యధిక పాపులారిటీ ఉన్న సెలబ్రిటీల్లో దక్షిణాది నుంచి చోటు దక్కింది ఒక్క కాజల్ కు మాత్రమే అంటే ఆమెకున్న అభిమానగణం ఏ రేంజిలో ఉందో అర్ధం చేసుకోవచ్చు. ఫేస్ బుక్ లో అత్యధిక ఫ్యాన్ ఫాలోయింగ్ ఉన్న టాప్ 15 సెలబ్రిటీస్ లిస్ట్ రీసెంట్ గా విడుదల చేశారు. ఇందులో టీమిండియా క్రికెట్ కెప్టెన్ విరాట్ కోహ్లీది ఫస్ట్ ప్లేస్. సినిమా నటుల్లో హయ్యస్ట్ ఫాలోయర్లు ఉన్నది సల్మాన్ ఖాన్ కే. థర్డ్ అండ్ ఫోర్త్ ప్లేసుల్లో బాలీవుడ్ బ్యూటీలు దీపికా పదుకొనే.. ప్రియాంక చోప్రా ఉన్నారు. ఇందులో 15వ ప్లేస్ కాజల్ ది. ఆమె ముందు 14వ స్థానంలో ఉన్నది మ్యూజిక్ మాంత్రికుడు ఎ.ఆర్.రెహమాన్.
ఫేస్ బుక్ లో కాజల్ కు ఈ రేంజిలో ఫ్యాన్ ఫాలోయింగ్ ఉండటం సామాన్య విషయమేం కాదు. అవును మరి.. ఎందరో కుర్రాళ్లకు కలల సుందరి ఆమె. లేటెస్ట్ గా నేనే రాజు – నేనే మంత్రిలో రాధ పాత్రలో మరోసారి అందరినీ మెప్పించింది. ఈ ఏడాది కాజల్ మరో రెండు సినిమాల్లో వెండితెరపై మెరవనుంది. తన తొలి సినిమా హీరో కళ్యాణ్ రామ్ తో కలిసి ఎంఎల్ఎ (మంచి లక్షణాలున్న అబ్బాయి)… తమిళంలో స్టార్ హీరో విజయ్ పక్కన మెర్సల్ లో హీరోయిన్ గా నటిస్తోంది.
