ఉత్తరప్రదేశ్‌లో ప్రభుత్వ ఉద్యోగాల ప్రత్యక్ష నియామకాల కోసం క్యారెక్టర్ వెరిఫికేషన్ నిబంధనలను ప్రభుత్వం కఠినతరం చేసింది. హింసాత్మక పద్ధతుల ద్వారా ప్రస్తుత సామాజిక వ్యవస్థను మార్చాలని లక్ష్యంగా పెట్టుకున్న సంస్థల్లో పాల్గొనే వ్యక్తులను ప్రభుత్వ ఉద్యోగాలకు అనర్హులుగా పరిగణించే అవకాశం ఉందని కొత్త మార్గదర్శకాల్లో పేర్కొంది. ముఖ్యమంత్రి యోగి ఆదిత్యనాథ్ నేతృత్వంలోని ప్రభుత్వం తీసుకున్న ఈ నిర్ణయం రాజకీయంగా చర్చనీయాంశమైంది. ఇటీవల జరిగిన ఓ నిరసనలో పాలనా మార్పు కోసం హింసాత్మక పిలుపులు ఇచ్చారన్న ఆరోపణల నేపథ్యంలో ఈ చర్య తీసుకున్నట్లు తెలుస్తోంది. దీనిపై సమాజ్‌వాదీ పార్టీ, కాంగ్రెస్ సహా ప్రతిపక్షాలు విమర్శలు గుప్పించాయి.
రాష్ట్ర నియామకాల శాఖ ప్రధాన కార్యదర్శి ఎం. దేవరాజ్ ఈ ఉత్తర్వులు జారీ చేశారు. అయితే, ఒక వ్యక్తి రాజకీయ సిద్ధాంతాలు లేదా అభిప్రాయాల ఆధారంగా మాత్రమే అతడిని ప్రభుత్వ ఉద్యోగానికి అనర్హుడిగా ప్రకటించకూడదని స్పష్టం చేశారు. అలాగే, కేవలం ఎఫ్‌ఐఆర్ నమోదైనంత మాత్రాన లేదా దర్యాప్తు కొనసాగుతున్న కారణంతోనే అభ్యర్థిని తిరస్కరించకూడదని పేర్కొన్నారు.
ప్రస్తుత సామాజిక వ్యవస్థను హింసాత్మక మార్గాల్లో మార్చడమే లక్ష్యంగా పనిచేసే సంస్థల్లో సభ్యులుగా ఉన్న వ్యక్తులను ప్రభుత్వ ఉద్యోగాలకు అనర్హులుగా పరిగణించే అవకాశం ఉందని ఉత్తర్వుల్లో పేర్కొన్నారు. అభ్యర్థి 21 ఏళ్లు దాటిన తర్వాత, క్యారెక్టర్ వెరిఫికేషన్ తేదీకి ముందు మూడేళ్ల వ్యవధిలో ఇలాంటి కార్యకలాపాల్లో పాల్గొంటే, అతడు ఇప్పటికీ వాటిలో చురుకుగా ఉన్నట్లు పరిగణించవచ్చని తెలిపారు. అయితే, ఆ వ్యవధిలో అతడి ప్రవర్తన మారిందని నిరూపించే స్పష్టమైన ఆధారాలు ఉంటే ఈ నిబంధనను వర్తింపజేసే విషయంలో మినహాయింపు ఉండవచ్చు.
Also Read:కేటీఆర్‌కు కొండా సురేఖ సారీ
అభ్యర్థిపై ఎఫ్‌ఐఆర్ నమోదవడం లేదా దర్యాప్తు పెండింగ్‌లో ఉండటం మాత్రమే ప్రభుత్వ ఉద్యోగానికి అనర్హతగా మారదని ప్రభుత్వం స్పష్టం చేసింది. నేర విచారణ కొనసాగుతోందన్న కారణంతోనే అభ్యర్థిని తిరస్కరించకూడదని పేర్కొంది. కొత్త విధానం ప్రకారం, అభ్యర్థుల క్యారెక్టర్ వెరిఫికేషన్ నివేదికలను పోలీసులు 30 రోజుల్లో సమర్పించాల్సి ఉంటుంది. రాష్ట్ర ప్రభుత్వ శాఖలు, ఉత్తర్వుల పరిధిలోకి వచ్చే ఇతర ప్రభుత్వ సంస్థల్లో ప్రత్యక్ష నియామకాల ద్వారా ఎంపికైన అభ్యర్థులకు ఈ గడువు వర్తిస్తుంది.ఇప్పటికే ప్రభుత్వ ఉద్యోగాల్లో పనిచేస్తున్న సిబ్బందికి ఇదే క్యారెక్టర్ వెరిఫికేషన్ ప్రక్రియను మళ్లీ నిర్వహించాల్సిన అవసరం లేదని ఉత్తర్వుల్లో స్పష్టం చేశారు.