ఆంధ్రప్రదేశ్‌లో రాబోయే మూడు రోజుల పాటు తేలికపాటి నుంచి మోస్తరు వర్షాలు కురిసే అవకాశం ఉందని అమరావతి వాతావరణ కేంద్రం వెల్లడించింది. ఉత్తర కోస్తాంధ్ర, దక్షిణ కోస్తాంధ్ర ప్రాంతాల్లో నేడు అక్కడక్కడ భారీ వర్షాలు కురిసే సూచనలు ఉన్నాయని తెలిపింది. ఉరుములు, మెరుపులతో కూడిన వర్షాలు పడే అవకాశం ఉందని హెచ్చరించింది. కోస్తాంధ్ర, రాయలసీమ ప్రాంతాల్లో గంటకు 30 నుంచి 50 కిలోమీటర్ల వేగంతో బలమైన ఈదురుగాలులు వీచే అవకాశముందని పేర్కొంది.
దక్షిణ ఛత్తీస్‌గఢ్, ఒడిశా పరిసర ప్రాంతాల్లో కొనసాగుతున్న వాయుగుండం ఉత్తరం వైపు గంటకు సుమారు 18 కిలోమీటర్ల వేగంతో కదులుతోందని వాతావరణ శాఖ తెలిపింది. ఈ వాయుగుండం సాయంత్రానికి బలహీనపడే అవకాశం ఉందని అంచనా వేసింది. దీని ప్రభావంతో ఆంధ్రప్రదేశ్‌లోని పలు ప్రాంతాల్లో వర్షాలు కురిసే అవకాశముందని పేర్కొంది.
దక్షిణ అండమాన్ సముద్రంలో మరో అల్పపీడనం కొనసాగుతోందని వాతావరణ కేంద్రం వెల్లడించింది. రాబోయే 24 గంటల్లో ఇది సుస్పష్ట అల్పపీడనంగా మారే అవకాశం ఉందని తెలిపింది. ఈ వ్యవస్థ కదలికలు, తీవ్రత ఆధారంగా వాతావరణ పరిస్థితుల్లో మార్పులు చోటుచేసుకునే అవకాశముంది.
రాయలసీమ ప్రాంతంలో రాబోయే మూడు రోజుల పాటు అక్కడక్కడ తేలికపాటి నుంచి మోస్తరు వర్షాలు కురిసే సూచనలు ఉన్నాయని అధికారులు తెలిపారు. కోస్తాంధ్ర, రాయలసీమలో ఈదురుగాలులు వీచే అవకాశం ఉన్నందున ప్రజలు అప్రమత్తంగా ఉండాలని సూచించారు.
Also Read:తులాభారం షూట్‌లో రవితేజ
తీర ప్రాంత ప్రజలు, సంబంధిత ప్రభుత్వ విభాగాలు ముందస్తు జాగ్రత్తలు తీసుకోవాలని వాతావరణ శాఖ సూచించింది. ఉరుములు, మెరుపులతో కూడిన వర్షాలు పడే సమయంలో చెట్ల కింద, విద్యుత్ స్తంభాల సమీపంలో ఉండకూడదని, బలమైన గాలులు వీచే సమయంలో బయటకు వెళ్లేటప్పుడు అప్రమత్తంగా ఉండాలని సూచించారు.