ఇప్పటికే 105 మంది అభ్యర్థులతో తొలిజాబితా ప్రకటించిన కేసీఆర్ మిగిలిన 14 స్ధానాలపై తీవ్ర కసరత్తు చేస్తున్నారు. ఇప్పటికే పెద్దపల్లి ఎంపీ బాల్క సుమన్‌ను చెన్నూరు అసెంబ్లీ బరిలో నిలిపిన కేసీఆర్ తాజాగా మరో ఎంపీ మల్లారెడ్డిని మేడ్చల్ బరిలోకి దింపేందుకు కసరత్తు చేస్తున్నారు. గత సార్వత్రిక ఎన్నికల్లో దేశంలోనే అతిపెద్ద ఎంపీ స్ధానమైన మల్కాజ్‌గిరి నుంచి టీడీపీ తరపున పోటీ చేసిన ఆయన తర్వాత టీఆర్ఎస్‌లో చేరారు.
మేడ్చల్ సీటు కోసం తీవ్ర పోటీ నెలకొంది. గ్రేటర్ టీఆర్ఎస్ అధ్యక్షుడు మైనంపల్లి హన్మంతరావుతో పాటు నక్కా ప్రభాకర్ గౌడ్,సింగిరెడ్డి హరివర్థన్ రెడ్డి,తాజా మాజీ ఎమ్మెల్యే సుధీర్ రెడ్డి తీవ్ర ప్రయత్నాలు చేస్తున్నారు. అయితే,కేసీఆర్ మాత్రం మల్లారెడ్డి అభ్యర్థిత్వం వైపే మొగ్గుచూపారని సమాచారం.
ఈ నెల 13న టీఆర్ఎస్ రెండోజాబితాను విడుదల చేసే అవకాశం ఉంది. అయితే మల్కాజిగిరి, వికారాబాద్‌ అసెంబ్లీ స్థానాలపై సస్పెన్స్‌ కొనసాగుతోంది. ఇక్కడ కూడా కొత్త వారికి అవకాశం కల్పించే అవకాశాలు కనిపిస్తున్నాయి. మరోవైపు ఉప్పల్ మాజీ ఎమ్మెల్యే బండారు రాజిరెడ్డి,వరంగల్ జిల్లాకు చెందిన సీనియర్ కాంగ్రెస్ నేతలు ఈ నెల 12న కేసీఆర్ సమక్షంలో గులాబీ కండువా కప్పుకొనున్నారు.
