సముద్ర మార్గాలను రక్షించాలని అన్ని దేశాలకు ప్రధాని నరేంద్ర మోదీ పిలుపునిచ్చారు. జీ7 సదస్సు అవుట్రీచ్ సెషన్లో అమెరికా అధ్యక్షుడు డొనాల్డ్ ట్రంప్ సహా ప్రపంచ దేశాల నాయకులను ఉద్దేశించి మోదీ ప్రసంగిస్తూ… అంతర్జాతీయ నౌకాయాన మార్గాల భద్రత ప్రపంచ వాణిజ్యానికి, ఆర్థిక స్థిరత్వానికి అత్యంత కీలకమని పేర్కొన్నారు.
భారత్-అమెరికా ద్వైపాక్షిక సంబంధాలను బలోపేతం చేయడం, కీలక రంగాలలో సహకారాన్ని పెంపొందించడమే లక్ష్యంగా ఇరు దేశాల అధినేతలు పలు అంశాలపై చర్చలు జరిపే అవకాశం ఉంది. ఫ్రాన్స్లో జరుగుతున్న జీ7 సదస్సు నేపథ్యంలో ప్రధానమంత్రి నరేంద్ర మోదీ తన అమెరికా కౌంటర్ పార్ట్ (అధ్యక్షుడు ట్రంప్)తో ద్వైపాక్షిక సమావేశం నిర్వహించనున్నారు. కీలక రంగాలలో వ్యూహాత్మక బంధాన్ని పటిష్టం చేసుకునే దిశగా వీరిద్దరి మధ్య విస్తృత స్థాయి చర్చలు జరగనున్నాయి.
పశ్చిమ ఆసియా (మిడిల్ ఈస్ట్) లోని తాజా పరిస్థితులు, ముఖ్యంగా ‘స్ట్రెయిట్ ఆఫ్ హోర్ముజ్’ ప్రాంతంలో నెలకొన్న ఉద్రిక్తతలు మరియు ప్రాంతీయ భద్రతా పరిణామాలు ఈ చర్చల్లో ప్రముఖంగా ప్రస్తావనకు రానున్నాయి.ఇరు దేశాల మధ్య దీర్ఘకాలిక ఇంధన భాగస్వామ్యాన్ని నిర్మించడంపై దృష్టి పెట్టనున్నారు. అమెరికా నుండి భారతదేశం చేసుకునే ఇంధన దిగుమతులు ఈ చర్చల్లో కీలక పాత్ర పోషిస్తాయి.
భారత్-అమెరికా ద్వైపాక్షిక వాణిజ్య ఒప్పందానికి సంబంధించిన చర్చలు చివరి దశకు చేరుకున్నాయని, రాబోయే కొన్ని వారాల్లో ఈ ఒప్పందం పూర్తయ్యే అవకాశం ఉందని వర్గాలు తెలిపాయి. గల్ఫ్ ప్రాంతంలో పెరుగుతున్న ఉద్రిక్తతల నేపథ్యంలో, సముద్ర మార్గాలను రక్షించాలని మరియు నావికులు (సీఫేరర్స్) తమ విధులను సురక్షితంగా నిర్వహించుకునేలా చూడాలని ప్రధాని మోదీ అన్ని దేశాలను కోరారు. మంగళవారం జీ7 సదస్సులో ప్రసంగించిన మోదీ, అంతర్జాతీయ షిప్పింగ్ లేన్ల రక్షణ ప్రపంచ ఆర్థిక వ్యవస్థకు ఎంతో ముఖ్యమని ట్రంప్ సమక్షంలోనే స్పష్టం చేశారు. ప్రాణభయం లేకుండా నావికులు పని చేసుకునే వాతావరణం ఉండాలన్నారు.
Also Read:నిరుద్యోగులపై లాఠీఛార్జ్ హేయమైన చర్య!
స్ట్రెయిట్ ఆఫ్ హోర్ముజ్ గుండా సముద్ర రవాణాకు అంతరాయం కలగడం వల్ల ప్రపంచ ఆర్థిక వ్యవస్థపై ప్రతికూల ప్రభావం పడిందని ప్రధాని అన్నారు. అలాగే ఈ ప్రాంతంలో జరుగుతున్న ఘర్షణల వల్ల పలువురు భారతీయ పౌరులు ప్రాణాలు కోల్పోవడం పట్ల ఆయన ఆవేదన వ్యక్తం చేశారు.