రాజకీయంగా మరో మెట్టు ఎక్కారు వైసీపీ ఎమ్మెల్యే, సినీ నటి రోజా. తన చిరకాల కోరికైన మంత్రి పదవిని దక్కించుకున్నారు. ఏపీ కేబినెట్ పునర్‌వ్యవస్థీకరణలో భాగంగా 25 మందితో జగన్ మంత్రివర్గాన్ని విస్తరించగా రోజా చోటు దక్కించుకున్నారు. దీంతో చిరకాల వాంఛ నెరవేరగా రోజా ఎంపికతో ఆమె అనుచరుల్లో ఆనందం వెల్లివిరుస్తోంది. ఇక ఇవాళ కేబినెట్ ప్రమాణస్వీకార కార్యక్రమం జరగనుండగా ఆమెకు కీలక మంత్రిత్వ శాఖ దక్కే అవకాశం ఉంది.
చిత్తూరు జిల్లా నుంచి మూడో మంత్రిగా రోజాకు అవకాశం కల్పించారు జగన్. వాస్తవానికి జగన్ అధికారంలోకి వచ్చిన సమయంలోనే రోజాకు మంత్రి పదవి దక్కుతుందని అంచనా వేశారు. అయితే అప్పట్లో అది సాధ్యపడలేదు. అయినా జగన్…రోజాకు ఏపీ ఇండస్ట్రీయల్ కార్పొరేషన్ ఛైర్మన్‌గా రోజాను నియమించి సముచిత స్ధానం కల్పించారు. గతంలో ఏ సామాజిక సమీకరణాలు రోజాకు మంత్రి పదవి రాకుండా చేశాయో ఇప్పుడు సైతం అవే సమీకరణాలు రోజాకు మంత్రి పదవి వచ్చేలా చేశాయి.
చిత్తూరు జిల్లా నగరి నుండి వైసీపీ తరపున రెండు సార్లు ఎమ్మెల్యేగా గెలిచారు రోజా. ఓ వైపు పాలిటిక్స్‌లో ఉంటూనే మరోవైపు సినిమాలతో బిజీగా ఉన్నారు. ముఖ్యంగా బుల్లితెరపై ప్రసారం అయ్యే జబర్దస్త్‌ షోలో జడ్జిగా రోజా అందరి మన్ననలు పొందారు. రాజకీయాల్లో ఎంత బిజీగా ఉన్నా రోజా….జబర్దస్త్‌ను మాత్రం వీడలేదు. తాజాగా మంత్రిగా ఎంపిక కావడంతో జబర్దస్త్‌కు ఆమె గుడ్ బై చెప్పే అవకాశాలు స్పష్టంగా కనిపిస్తున్నాయి.
