ప్రధాని మోడీ ప్రసంగంపై విద్యుత్ శాఖామంత్రి గుంటకండ్ల జగదీష్ రెడ్డి ఫైర్ అయ్యారు. డబుల్ ఇంజిన్ వస్తుంది అది కేసీఆర్ నేతృత్వంలో అని తెలిపారు. మోడీ మాటల్లో అన్ని అబద్ధాలేనని…ఎలివేటెడ్ కారిడార్ ఎక్కడ ఉందో చెప్పాలన్నారు. రోడ్లకు నిధులిచ్చింది లేదు.. విదిలిచ్చింది లేదన్నారు.
సిగ్నల్ ఫ్రీ ఆలోచన ముఖ్యమంత్రి కేసీఆర్ ది అన్నారు. అది అమలు పరిచిన ఘనత మంత్రి కేటీఆర్ ది అన్నారు. ఇప్పటికే 46 చోట్ల సిగ్నల్ ఫ్రీ వ్యవస్థ అమలులో ఉందన్నారు. ఇందులో కేంద్రం పాత్ర ఉందనడం అబద్దమేనన్నారు. 50 వేల కోట్లతో సంక్షేమ పథకాలు అమలు పరుస్తున్న ఏకైక రాష్ట్రం తెలంగాణ అన్నారు.
తెలంగాణ కంటే ఉత్తరప్రదేశ్ మూడింతలు పెద్దది, మధ్యప్రదేశ్ రెండింతలు పెద్దది, అక్కడ ప్రభుత్వాలు సంక్షేమ రంగానికి ఖర్చు పెడుతుంది ఎంత? అని ప్రశ్నించారు. 2014 కు ముందు, వెనుక అన్నది అధ్యయనం చేస్తేనే అభివృద్ధి గురించి తెలుస్తోందన్నారు. విద్యుత్ రంగంలో సాధించిన విజయాలు తెలంగాణ అభివృద్ధికి ప్రతీకలు అన్నారు. ఆ విజయాల వెనుక ముఖ్యమంత్రి కేసీఆర్ దార్శనికత ఉందన్నారు.
