బీజేపీ పార్టీపై ప్రశ్నల వర్షం కురిపించారు మంత్రి హరీశ్ రావు. నల్గొండ ఫ్లోరైడ్ సమస్యను తీర్చిన కేసీఆర్ రుణం తీర్చుకునే అవకాశం వచ్చిందని తెలిపారు మంత్రి హరీశ్ రావు. మర్రిగూడ మండలం కేంద్రంలో హరీశ్‌రావు ఎన్నికల ప్రచారం నిర్వహించారు.
ఈ సందర్భంగా మాట్లాడిన హరీశ్..అన్ని వర్గాలను కడుపులో పెట్టుకొని చూసుకునే టీఆర్ఎస్ పార్టీ వృద్ధులకు రూ. 2000 పెన్షన్ ఇస్తుంది. ఇందులో ఢిల్లీ బీజేపీది ఒక్క రూపాయి ఉందా అని అడుగుతున్నాను. పేద ఆడబిడ్డ పెళ్లయితే రూ. లక్ష ఇస్తున్నాం అన్నారు.
మునుగోడు ఎన్నికల్లో రాజగోపాల్ రెడ్డి గెలిస్తే ఒక వ్యక్తికే లాభం అవుతుంది…ఒక వ్యక్తి గెలవాలా..? మునుగోడు ప్రజలు గెలవాలా..? అన్నది ఆలోచించుకోవాలని సూచించారు. మునుగోడు ప్రజలకు పాలేందో, నీళ్లు ఏందో అర్థమైందన్నారు. ఇప్పటికే సిలిండర్ ధరలు పెంచిన బీజేపీ సబ్సిడీ సిలిండర్లు సంవత్సరానికి మూడు మాత్రమే ఇవ్వబోతున్నామని ప్రకటించిందన్నారు.
రైతుబంధు, రైతు బీమాలో మీ రూపాయి ఉందా అని బీజేపీని అడుగుతున్నాను అని హరీశ్‌రావు ప్రశ్నల వర్షం కురిపించారు. ఎన్నికలు అయిపోగానే ఢిల్లీ పార్టీ నాయకులు అక్కడికే లైన్ కట్టి వెళ్ళిపోతారు. ఇక్కడ ఉండేది కేసీఆర్, టీఆర్ఎస్ పార్టీ మాత్రమేనన్నారు. మీ కళ్ళ ముందే ఉండే టీఆర్ఎస్ పార్టీ కావాలా..? ఎక్కడో ఢిల్లీలో ఉండే బీజేపీ కావాలా..? అనేది మునుగోడు ప్రజలు ఆలోచించాలన్నారు.
