రాజకీయాలకు అతీతంగా గ్రామాల అభివృద్ధి..

రాజకీయాలకు అతీతంగా గ్రామాలను అభివృద్ధి చేయడమే ప్రభుత్వ లక్ష్యమని తెలిపారు మంత్రి ఎర్రబెల్లి దయాకర్ రావు. పల్లె, పట్టణ ప్రగతి కార్యక్రమంపై మీడియాతో మాట్లాడిన ఎర్రబెల్లి…జూలై 1 నుండి పది రోజుల పాటు పల్లె ప్రగతి కార్యక్రమం నిర్వహిస్తున్నట్లు వెల్లడించారు.

గ్రామాల్లో ప్రజాప్రతినిధులు, అధికారులు రాత్రి బస చేసి ప్రజల సమస్యలు తెలుసుకోవాలని సూచించారు. గ్రామాల్లో ఖాళీ స్థలాల పరిశుభ్రతపై కఠినంగా వ్యవహరించాలని అన్నారు. తొలుత యజమానికి నోటీసులు ఇవ్వాలని, స్పందించకపోతే స్థలాన్ని పంచాయతీ స్వాధీనం చేసుకోవాలని చెప్పారు.

అసంపూర్తిగా ఉన్న వైకుంఠధామాల నిర్మాణం పది రోజుల్లో పూర్తి చేయాలని స్థానిక ప్రజాప్రతినిధులను, అధికారులను ఆయన ఆదేశించారు. గడువులోగా నిర్మాణం పూర్తి చేయకుంటే చర్యలు తప్పవని ఆయన హెచ్చరించారు.