ఏపీ ముఖ్యమంత్రి చంద్రబాబు సంచలన వ్యాఖ్యలు చేశారు తెలంగాణ మంత్రి ఎర్రబెల్లి దయాకర్ రావు. చంద్రబాబు టీడీపీని నాశనం చేశారన్నారు. కేసీఆర్ తన కింద పనిచేశాడంటూ పదే పదే చంద్రబాబు వ్యాఖ్యానించడంపై స్పందించారు ఎర్రబెల్లి. చంద్రబాబు కింద తాము పనిచేయలేదని..ఆయనే మాకింద పనిచేశారన్నారు. టీడీపీలో చంద్రబాబు కంటే ముందే కేసీఆర్, తాను క్రియాశీలకంగా ఉన్నామని చెప్పారు. చంద్రబాబు కాలాంతకుడు. తెలంగాణలోనే కాదు ఆంధ్రాలోనూ టీడీపీనీ నాశనం పట్టించేదాకా ఆయన నిద్రపోడని చెప్పారు.
ఉమ్మడి రాష్ట్రంలో గ్రూపుల సంస్కృతిని పెంచిపోషించింది చంద్రబాబే అన్నారు. తెలంగాణలో టీఆర్ఎస్ ను ఓడించాలని చూసిన చంద్రబాబుకు ఆంధ్ర ప్రజలు తగిన బుద్ది చెబుతారని తెలిపారు. కాంగ్రెస్‌కు వ్యతిరేకంగా ఎన్టీఆర్ టీడీపీని స్థాపిస్తే అదే కాంగ్రెస్‌తో పొత్తు పెట్టుకోవడాన్ని ఏ ఒక్కరూ సమర్థించలేదని అన్నారు. ఎన్టీఆర్ స్థాపించిన టీడీపీలో సీఎం కేసీఆర్, తాను సీనియర్లుగా ఉన్నామని, ఆ తరువాతే చంద్రబాబు వచ్చారని, ఆయన తమ కంటే జూనియర్ ఎర్రబెల్లి వ్యాఖ్యానించారు. పార్టీలో నాయకుల మధ్య చిచ్చు పెట్టే సంస్కృతి చంద్రబాబుది అన్నారు.
