నాగాలాండ్ పర్యాటక శాఖ మంత్రి తెమ్జేన్ ఇమ్నా అలోంగ్ సోషల్ మీడియాలో చాలా చురుగ్గా ఉంటారనే విషయం తెలిసిందే. తన ఎక్స్ (గతంలో ట్విట్టర్) మరియు ఇతర సామాజిక మాధ్యమాల్లో ఆయన తరచుగా హాస్యభరితమైన, ఆలోచింపజేసే వీడియోలను పంచుకుంటూ ఉంటారు. తాజాగా ఆయన షేర్ చేసిన ఒక ఫన్నీ వీడియో సాంకేతిక పరిజ్ఞానం పరిమితులపై ఆన్లైన్లో పెద్ద చర్చకే దారితీసింది.
ఫేషియల్ రికగ్నిషన్ (ముఖ గుర్తింపు) సాంకేతికత తేడాలను సరిగ్గా గుర్తించలేకపోవడం వల్ల కేవైసీ (KYC) ప్రక్రియను పూర్తి చేయడానికి ఈశాన్య భారతానికి చెందిన ఒక వ్యక్తి ఎంతగా ఇబ్బంది పడుతున్నాడో ఓ వీడియోలో చూపించారు. ఈశాన్య భారతీయులందరూ ఒకేలా ఉంటారు అనే సాధారణ అభిప్రాయాన్ని పునాదిగా చేసుకుని రూపొందించిన ఈ కామెడీ వీడియోకు మంత్రి సరదా వ్యాఖ్యను జోడించడంతో ఇది నెట్టింట వైరల్ అయింది. ఇప్పటికే ఈ వీడియోను 3.5 లక్షల మందికి పైగా వీక్షించగా, 10,000 కంటే ఎక్కువ లైక్లు వచ్చాయి.
కేవైసీ కోసం స్పష్టమైన ఫోటో పడేలా చేసేందుకు ఆ వ్యక్తి కనురెప్పలను విప్పి పట్టుకోవడానికి గ్రామస్థులు సహాయం చేయడానికి ప్రయత్నించడం నవ్వులు పూయిస్తోంది. మరోవైపు ఈ వీడియోను చూసిన నెటిజన్లు ప్రస్తుత సాంకేతికతలోని లోపాలను వేలెత్తి చూపుతూ, అధికారులు తగిన ప్రత్యామ్నాయ పరిష్కారం చూపాలని కోరుతున్నారు.
సమస్య మీలో కాదు, సాంకేతికతలోనే ఉంది. భారతీయ పౌరుల అన్ని రకాల శారీరక లక్షణాలను దృష్టిలో ఉంచుకుని ఈ సిస్టమ్లను తయారు చేయలేదు అని ఒక వినియోగదారు కామెంట్ చేశారు.
మరొక యూజర్ ఎక్స్ (X) యొక్క ఏఐ చాట్బాట్ ‘గ్రోక్’ (Grok) ను ట్యాగ్ చేస్తూ… ఎపికాంథిక్ ఫోల్డ్ (Epicanthic fold – కంటి పైరెప్ప లోపలి మూలను కప్పివుంచే సహజమైన కంటి ఆకృతి) ఉన్నవారి బయోమెట్రిక్ ఐరిస్ స్కాన్ చేయడానికి ఎలాంటి స్కానర్లు అందుబాటులో ఉన్నాయో చెప్పాలని కోరారు.
Also Read:టెక్నాలజీ నన్ను కాపాడింది!
నాగాలాండ్ మంత్రి తెమ్జేన్ ఇమ్నా అలోంగ్ సోషల్ మీడియా వేదికగా నిరంతరం ప్రజాదరణ పొందుతూనే ఉంటారు. గతంలో ఇండోర్కు చెందిన ‘డాన్సింగ్ కాప్’ మైఖేల్ జాక్సన్ శైలిలో డ్యాన్స్ చేస్తూ ట్రాఫిక్ను నియంత్రిస్తున్న వీడియోను పంచుకుంటూ… స్వంతంగా ప్రతిభను చాటుకోవడానికి వేదికలను నిర్మించుకోవాలని ఆలోచింపజేసే సందేశాన్ని ఇచ్చిన సంగతి తెలిసిందే.