కేరళంలో కాంగ్రెస్ నేతృత్వంలోని యూడీఎఫ్ ప్రభుత్వం కృత్రిమంగా విద్యుత్ సంక్షోభాన్ని సృష్టిస్తోందని ప్రతిపక్ష నేత, మాజీ ముఖ్యమంత్రి పినరయి విజయన్ ఆరోపించారు. విద్యుత్ కొనుగోలు ఒప్పందంలో పారదర్శకత లేదని, ప్రైవేట్ సంస్థలకు ప్రయోజనం చేకూర్చేలా ప్రభుత్వం వ్యవహరిస్తోందని విమర్శించారు. నవంబర్ 6న తిరువనంతపురంలో నిర్వహించిన మీడియా సమావేశంలో ఆయన ఈ వ్యాఖ్యలు చేశారు.
దేశవ్యాప్తంగా విద్యుత్ కొరతకు సంబంధించిన పరిస్థితులు ప్రస్తుతం కనిపించడం లేదని పినరయి విజయన్ అన్నారు. వాస్తవానికి దేశంలో విద్యుత్ లభ్యత మెరుగుపడుతున్న పరిస్థితులు ఉన్నాయని పేర్కొన్నారు. అలాంటప్పుడు కేరళలో తీవ్రమైన విద్యుత్ సంక్షోభం ఉందని ముఖ్యమంత్రి ఎందుకు చెబుతున్నారో అర్థం కావడం లేదన్నారు. సహజంగా విద్యుత్ కొరత ఏర్పడే పరిస్థితులు లేనప్పటికీ, కొరత ఉందనే ప్రచారం చేయడం అనుమానాలకు తావిస్తోందని వ్యాఖ్యానించారు.
దేశంలో విద్యుత్ ఉత్పత్తిలో అధిక భాగం పెద్ద ప్రైవేట్ కార్పొరేట్ సంస్థల చేతుల్లో ఉందని, విద్యుత్ సంక్షోభం పేరుతో వాటి ప్రయోజనాలను కాపాడే ప్రయత్నం జరుగుతోందా అనే అంశాన్ని పరిశీలించాలని సూచించారు.
విద్యుత్ కొనుగోలు వ్యవహారంలో జీఎన్ఏ ఎనర్జీ సంస్థపై కూడా ఆయన ప్రశ్నలు లేవనెత్తారు. ఈ సంస్థ విద్యుత్ ఉత్పత్తి చేసే కంపెనీ కాదని, కేవలం డిజిటల్ ఓవర్ ది కౌంటర్ (ఓటీసీ) ప్లాట్‌ఫామ్ మాత్రమేనని పేర్కొన్నారు. ఎలాంటి టెండర్లు, పారదర్శక విధానాలు పాటించకుండా ఆ సంస్థ ద్వారా విద్యుత్ కొనుగోలు చేయాలని నిర్ణయించడం ఏమిటని ప్రశ్నించారు. అసలు జీఎన్ఏ ఏ సంస్థ నుంచి విద్యుత్ సరఫరా చేస్తుందో ప్రభుత్వం స్పష్టత ఇవ్వాలని డిమాండ్ చేశారు.
Also Read:ఆసీస్ కన్సల్టెంట్‌ కోచ్‌గా మైక్ హస్సీ
కేరళం స్టేట్ ఎలక్ట్రిసిటీ బోర్డు (కేఎస్ఈబీ) ఆర్థిక నష్టాలు వచ్చే అవకాశం ఉందని నివేదిక ఇచ్చినప్పటికీ ప్రభుత్వం పట్టించుకోలేదని ఆరోపించారు. విద్యుత్ శాఖ కార్యదర్శి ఆర్. రాజమాణిక్యాన్ని అవకతవకలను గుర్తించినందుకే పదవి నుంచి బదిలీ చేశారని విమర్శించారు.