బాలీవుడ్ భామ కంగనా రనౌత్ తెలుగులో ఒకే ఒక్క సినిమా చేసింది. అదే ..పూరి జగన్నాథ్ దర్శకత్వంలో వచ్చిన ‘ఏక్ నిరంజన్’. ఈ సినిమాకు ఆమె ప్రత్యేక ఆకర్షణ అవుతుందనుకున్నారు కానీ.. అలాంటిదేమీ జరగలేదు. దీంతో ఈ సినిమా తర్వాత తెలుగులో ఏ సినిమా చెయ్యలేదు కంగన. అయితే కంగన తర్వాతి కాలంలో బాలీవుడ్లో టాప్ రేంజికి వెళ్లిన సంగతి తెలిసిందే.
అయితే కంగన మాత్రం ఏక్‌నిరంజన్‌ సినిమా చెయ్యడానికి కారణం డబ్బేనట. తనే స్వయంగా ఈ విషయాన్ని చెప్పి అందరినీ ఆశ్చర్యపరిచింది. తాజాగా ‘రంగూన్’ ప్రమోషన్లలో భాగంగా హైదరాబాద్ వచ్చిన కంగన.. మరోసారి ‘ఏక్ నిరంజన్’ ఊసెత్తింది. ఈ సినిమా షూటింగ్ సందర్భంగా తనకు ప్రభాస్ తో గొడవైనట్లు ఆమె వెల్లడించడం గమనార్హం.
మరి కంగనా, ప్రభాస్ ల మధ్య ఎందుకు గొడవ జరిగింది అంటే… ఒకసారి తనకూ.. ప్రభాస్ కు పెద్ద గొడవైందని, దీంతో వారు రోజులు మాట్లాడుకోకుండా ఉండిపోయారని కంగన వెల్లడించింది. అయితే ఆ తర్వాత ఏమైందో చెప్పని కంగన.. ‘బాహుబలి’లో ప్రభాస్ ను చూసి తాను చాలా సంతోషించానని చెప్పింది. బాహుబలిలో ప్రభాస్ నటన.. అతడి విన్యాసాలు చూసి చాలా గర్వించిందని, ప్రభాస్ కూడా ఇప్పుడు తన కెరీర్ చూసి గర్విస్తూ ఉండొచ్చు అని వ్యాఖ్యానించింది కంగన.
‘ఏక్ నిరంజన్’ తర్వాత మళ్లీ తెలుగులో నటించలేదు ఎందుకని కంగనను అడిగితే.. తాను సౌత్ సినిమా నేటివిటీకి పనికిరానేమో అని తనదైన శైలిలో చెప్పిందామె. ఇదిలా ఉండగా..గత కొన్నేళ్ళలో అద్భుతమైన పాత్రలతో మెప్పించిన కంగన.. ‘రంగూన్’లోనూ ఆకట్టుకుంటోంది. ఈ సినిమాకు మిక్స్డ్ రివ్యూస్ వస్తున్నప్పటికీ కంగన మీద మాత్రం అందరూ ప్రశంసల జల్లు కురిపిస్తున్నారు.
