దక్షిణాఫ్రికా ఓపెనర్ జార్డన్ హెర్మాన్ నమీబియాతో జరిగిన వన్డే అరంగేట్రంలోనే విజృంభించి 150 పరుగులు చేసి ప్రపంచ రికార్డును సమం చేశాడు. కేవలం 126 బంతుల్లోనే ఈ మైలురాయిని చేరుకోవడమే కాకుండా, అరంగేట్రం వన్డేలో అత్యంత వేగంగా 150 పరుగులు చేసిన బ్యాటర్గా రికార్డు సృష్టించాడు. అనంతరం రుబెన్ ట్రంపెల్మాన్ బౌలింగ్లో అవుట్ కాగా, దక్షిణాఫ్రికా నిర్ణీత ఓవర్లలో 348 పరుగుల భారీ స్కోరు సాధించింది.
విండ్హోక్లో నమీబియాతో జరిగిన మూడు వన్డేల సిరీస్లో మొదటి మ్యాచ్లో 24 ఏళ్ల జార్డన్ హెర్మాన్ ఈ ఘనత సాధించాడు. అయితే, 2025 ఫిబ్రవరి 10న లాహోర్లో న్యూజిలాండ్పై తన తొలి వన్డేలోనే 150 పరుగులు చేసిన మాథ్యూ బ్రీట్జ్కే పేరిట ఉన్న రికార్డును హెర్మాన్ దాటలేక సమం చేశాడు. బ్రీట్జ్కే ఆ ఫీట్ను 148 బంతుల్లో సాధించగా, హెర్మాన్ మరింత వేగంగా సాధించడం గమనార్హం. ప్రస్తుతం వన్డే అరంగేట్రంలోనే 150 పరుగులు చేసిన బ్యాటర్లుగా హెర్మాన్, బ్రీట్జ్కేలు మాత్రమే నిలిచారు.
ఇన్నింగ్స్ 42వ ఓవర్ ఐదో బంతికి నమీబియా సీమర్ రుబెన్ ట్రంపెల్మాన్ బౌలింగ్లో హెర్మాన్ అవుట్ అయ్యాడు. అయినప్పటికీ, ప్రోటీస్ ఇన్నింగ్స్లో అతను కీలక పాత్ర పోషించాడు. మూడో నంబర్ బ్యాటర్ టోనీ డి జోర్జి (84 బంతుల్లో 72 పరుగులు)తో కలిసి రెండో వికెట్కు 190 పరుగుల భాగస్వామ్యాన్ని నెలకొల్పాడు. దీంతో దక్షిణాఫ్రికా తొలి ఇన్నింగ్స్లో 348 పరుగులు చేసింది.
2027 వన్డే ప్రపంచకప్కు దక్షిణాఫ్రికా, జింబాబ్వేలతో కలిసి నమీబియా సహ ఆతిథ్యమిస్తున్నందున, వారికి ఈ సిరీస్ అత్యంత ముఖ్యం. అంతేకాకుండా, నమీబియా గడ్డపై ఆడుతున్న తొలి వన్డే మ్యాచ్ కావడంతో ఆతిథ్య జట్టుకు ఇది ఎంతో ప్రాధాన్యత కలిగిన మ్యాచ్.
Also Read:బిగ్ బాస్ హౌస్ గోడ దూకిన కంటెస్టెంట్!
జట్ల వివరాలు (ప్లేయింగ్ XI):
నమీబియా: మలాన్ క్రుగర్, లారెన్ స్టీన్క్యాంప్, అలెగ్జాండర్ వోల్షెంక్, జాన్ ఫ్రైలింక్, గెర్హార్డ్ ఎరాస్మస్ (కెప్టెన్), జేన్ గ్రీన్ (వికెట్ కీపర్), జేజే స్మిత్, రుబెన్ ట్రంపెల్మాన్, జాక్ బ్రాసెల్, మాక్స్ హెయింగో, బెర్నార్డ్ స్కోల్ట్జ్.
దక్షిణాఫ్రికా: జార్డన్ హెర్మాన్, కానర్ ఈస్టర్హుయిజెన్, టోనీ డి జోర్జి, డెవాల్డ్ బ్రెవిస్, రూబిన్ హెర్మాన్ (వికెట్ కీపర్), జేసన్ స్మిత్, కార్బిన్ బాష్, డువాన్ జాన్సెన్, బ్జోర్న్ ఫోర్టుయిన్ (కెప్టెన్), ప్రెనెలన్ సుబ్రాయెన్, క్వేనా మఫాకా.