హాలీడే సీజన్ మొదలైందంటే.. టాలీవుడ్‌లో టాప్‌ హీరోల సినిమాలు రిలీజ్‌కు రెడిగా ఉంటాయి. ఇక దసరా హలీడేస్ మొదలవ్వబోతున్నాయి. ఈ దసరా సీజన్‌లో ఎన్టీఆర్ నటించిన జై లవకుశ సెప్టెంబర్‌ 21న , మహేష్ బాబు నటించిన స్పైడర్ సెప్టెంబర్‌ 27న సినిమాలు రిలీజ్‌ అవుతున్నాయి. ఈ సీజన్‌లో జైలవకుశకు, స్పైడర్‌కు పోటీ ఉండబోతుంది. ఈ నేపథ్యంలో ఎవరి ప్రమోషన్లలో వాళ్లు బిజీగా అయ్యారు. ఇటీవల బిగ్‌ బాస్ షోలో హోస్ట్‌గా ఉన్న ఎన్టీఆర్ తన సినిమా ప్రమోషన్ కోసం బిగ్‌ బాస్ హౌస్‌లోకి గెస్ట్‌గా అడుగుపెట్టి తన సినిమా ఎలా ఉండబోతుందని చిన్న రియాల్టీ షో చూపించాడు. ఇక మహేష్ సినిమా స్పైడర్ ఆడియో వేడుకలు ఇటీవలె తెలుగు, తమిళంలో జరిగాయి. ఈ వేడుకలో మహేష్ ఎన్నడూ లేని నమ్మకంతో కనిపించాడు. స్పైడర్ సినిమా ఒక్కడు, శ్రీమంతుడు, పోకిరి స్థాయిలో నిలిచిపోతుందని మహేష్ చాలా కాన్ఫిడెంట్‌గా చెప్పాడు. ఈ నేపథ్యంలో స్పైడర్, జైలవకుశల మధ్య తీవ్ర పోటీ ఉండబోతుందని తెలుస్తోంది. ఈ క్రమంలో ఎన్టీఆర్ స్పందించాడు.
‘రెండు సినిమాలు ఒకేసారి విడుదలవ్వడాన్ని నేను క్లాష్‌గా కానీ, కాంపీటీషన్‌గా కానీ బావించట్లేదు. అన్నీ సినిమాలు బాగా ఆడాలి. సినిమాలో కంటెంట్‌, స్టఫ్‌ ?ఉంటే, ఏ సినిమానైనా ఆడుతోంది. ఈ సంవత్సరం సంక్రాంతికి మూడు సినిమాలు విడుదలయ్యాయి. మూడు బ్లాక్ బస్టర్లయ్యాయి. ఖైదీనెం 150 చిరంజీవి కెరీర్లోనే పెద్ద హిట్ సాధించింది. అలాగే బాబాయ్‌ బాలయ్య 100వ సినిమా గౌతమిపుత్ర శాతకర్ణి బాలయ్యకు హిట్ తెచ్చింది. ఇక శర్వానంద్ శతమానం భవతి తెలుగు సినిమాకు జాతీయ అవార్డును తెచ్చి పెట్టింది. ఇలా వంద సినిమాలు ఒకే రోజు విడుదలైనా సరే… అందులో కంటెంట్‌ ఉంటే.. నిలబడతాయి..’ అని తారక్ అన్నాడు.
అయితే ఇది వరకు దసరా బరిలో తారక్, మహేశ్ మూడు సార్లు పోటీ పడ్డారు. అందులో మొదటి సారి తారక్ హిట్ కొడితే మిగిలిన రెండు సార్లు మహేష్ హిట్ కొట్టాడు. దీంతో ఇప్పుడు నాలుగో సారి మరల తారక్, మహేశ్ మధ్య పోటీలో ఎవరు విన్ అవుతారా అని ఫ్యాన్స్ ఆత్రుతగా ఎదురుచూస్తున్నారు.
