ఇండియన్ ప్రీమియర్ లీగ్ (ఐపీఎల్) 15వ సీజన్ ముగింపు దశకు చేరుకుంది. ఆదివారంతో టోర్నీ లీగ్ దశ ముగిసింది,ఇక మంగళవారం నుండి ప్లే ఆఫ్ దశ ప్రారంభం కానుంది. పాయింట్ల పట్టికలో టాప్-4లో నిలిచిన గజరాత్ టైటాన్స్, రాజస్థాన్ రాయల్స్, లక్నో సూపర్ జెయింట్స్, రాయల్ చాలెంజర్స్ బెంగళూరు జట్లు ప్లే ఆఫ్ దశకు చేరుకున్నాయి.
షెడ్యూల్ ఇదే..
-24న జరిగే తొలి క్వాలిఫయర్‌లో గుజరాత్ టైటాన్స్, రాజస్థాన్ రాయల్స్ తలపడనున్నాయి. ఈ మ్యాచ్‌లో గెలిచిన జట్టు నేరుగా ఫైనల్స్‌కు దూసుకెళుతుంది. ఓడిన జట్టుకు మరో అవకాశం ఉంటుంది.
-25న జరిగే ఎలిమినేటర్ మ్యాచ్‌లో లక్నో సూపర్ జెయింట్స్, రాయల్ చాలెంజర్స్ బెంగళూరు అమీతుమీ తేల్చుకోనున్నాయి. ఈ మ్యాచ్‌లో ఓడిన జట్టు ఇంటిముఖం పడుతుంది. గెలిచిన జట్టు రెండో క్వాలిఫయర్ మ్యాచ్‌కు అర్హత సాధిస్తుంది.
-27న రెండో క్వాలిఫయర్ మ్యాచ్ జరగనుంది. తొలి క్వాలిఫయర్ మ్యాచ్‌లో ఓడిన జట్టుతో ఎలిమినేటర్ మ్యాచ్ విజేత ఈ రెండో క్వాలిఫయర్ మ్యాచ్‌లో తలపడుతుంది. ఈ మ్యాచ్‌లో నెగ్గిన జట్టు ఫైనల్స్‌కు చేరుకుంటుంది. తొలి క్వాలిఫయర్ మ్యాచ్‌లో గెలిచి నేరుగా ఫైనల్ చేరుకున్న జట్టుతో టైటిల్ కోసం పోటీపడుతుంది.
-29న ఫైనల్ మ్యాచ్ జరగనుంది. తొలి క్వాలిఫయర్‌తో పాటు ఎలిమినేటర్ మ్యాచ్‌కు కోల్ కతాలోని ఈడెన్ గార్డెన్స్ మైదానం ఆతిథ్యమివ్వనుంది. రెండో క్వాలిఫయర్ మ్యాచ్‌తో పాటు ఫైనల్స్‌కు అహ్మదాబాద్ లోని నరేంద్ర మోదీ స్టేడియం వేదికగా నిలవనుంది.
