భారత మహిళల కబడ్డీ జట్టు ‘తోకాయ్ సిటిజన్ జిమ్నాసియం’లో జరిగిన సంచలనాత్మక ఫైనల్ మ్యాచ్లో ఇరాన్ను 37-34 తేడాతో ఓడించి, తమ ఆసియా క్రీడల టైటిల్ను విజయవంతంగా నిలబెట్టుకుంది. గత హాంగ్జౌ ఎడిషన్లో కూడా స్వర్ణం గెలుచుకున్న భారత్, ఉత్కంఠగా సాగిన మొదటి భాగం (హాఫ్ టైమ్) ముగిసే సమయానికి 22-16 ఆధిక్యంలో నిలిచింది. రెండో భాగంలో ఇరాన్ చివరి నిమిషాల్లో తీవ్రంగా పోరాడినప్పటికీ భారత్ మ్యాచ్ వేగాన్ని శాసించింది. భారత డిఫెండర్ల క్రమశిక్షణతో కూడిన ప్రదర్శనతో విజయాన్ని ఖాయం చేసుకుని మరో స్వర్ణ పతకాన్ని ముద్దాడింది.
మొదటి భాగం ముగిసేసరికి భారత్ 22-16 ఆధిక్యంలో ఉండగా రెండో భాగంలో పుంజుకున్న మెరుగైన ప్రదర్శన చేసింది. అయితే, భారత్ సాధించిన తొలి ఆధిక్యాన్ని ఇరాన్ దాటలేకపోవడంతో భారత్ ఖాతాలో స్వర్ణం చేరింది. ఈ చారిత్రాత్మక విజయం తర్వాత భారత జట్టు మైదానంలో విక్టరీ లాప్ చేస్తూ ‘వందేమాతరం’ నినాదాలతో సందడి చేసింది. 2018 జకార్తా గేమ్స్లో ఇరాన్ చేతిలో ఓడి వెండి పతకంతో సరిపెట్టుకున్న మ్యాచ్ మినహా, ఆసియా క్రీడల్లో జరిగిన ప్రతి ఎడిషన్లోనూ భారత మహిళల కబడ్డీ జట్టు స్వర్ణ పతకాన్ని సాధించడం విశేషం.
ఆసియా క్రీడలు 2026 మహిళల కబడ్డీ ఫైనల్లో ఇరాన్ తమ సర్వస్వం ఒడ్డి పోరాడినప్పటికీ, చివరకు భారత్ కేవలం 3 పాయింట్ల తేడాతో విజయం సాధించింది. ఆసియాడ్ కబడ్డీ చరిత్రలో భారత మహిళల జట్టుకు ఇది 4వ స్వర్ణ పతకం కాగా, ప్రస్తుత ఆసియా క్రీడల్లో భారతదేశానికి ఇది 3వ పసిడి పతకం.మ్యాచ్ చివరి కొద్ది సెకన్లలో భారత డిఫెండర్లు అద్భుత ప్రదర్శన కనబరుస్తూ 37-33 ఆధిక్యాన్ని కొనసాగించారు.
ఇరాన్కు ఎలాంటి పాయింట్లు ఇవ్వకుండా భారత డిఫెండర్లు కట్టడి చేశారు. కొద్ది నిమిషాల సమయం మిగిలి ఉండగా స్కోరు భారత్కు అనుకూలంగా 34-28గా ఉంది. పింకీ రాయ్ చేసిన చిన్న పొరపాటు వల్ల ప్రత్యర్థికి ఒక పాయింట్ లభించినప్పటికీ, సంజూ దేవి సూపర్ రైడ్తో పాయింట్లు సాధించి భారత్ ఆధిక్యాన్ని 5 పాయింట్లకు (32-27) పెంచింది. మ్యాచ్ ముగియడానికి మరో 8 నిమిషాల సమయం మాత్రమే ఉండగా, స్కోరు 27-26తో భారత్ కేవలం ఒకే ఒక్క పాయింట్ ఆధిక్యంలో నిలిచింది. క్లిష్ట సమయంలో భారత్ ‘సూపర్ ట్యాకిల్’ చేసి కీలకమైన పాయింట్లను సాధించడంతో ఆధిక్యంలోకి వెళ్లింది. నికితా, పూజలు భారత జట్టు కోసం అద్భుతంగా రాణించారు.
Also Read:BB10:బిగ్ బాస్ చరిత్రలోనే తొలిసారి