ఐసీసీ 2027 వన్డే వరల్డ్ కప్ షెడ్యూల్ వచ్చేఇంది. సూపర్ 7 దశలో అభిమానులు తమకు నచ్చిన జట్ల మ్యాచ్ టికెట్లను ముందుగానే బుక్ చేసుకోవడానికి వీలుగా ఐసీసీ జట్లకు ముందస్తు సీడింగ్ (Pre-seeding) కేటాయించింది. దీనివల్ల నవంబర్ 7న కేప్‌టౌన్‌లోని న్యూలాండ్స్ స్టేడియంలో భారత్, పాకిస్తాన్ జట్లు రెండోసారి తలపడే అవకాశం ఉంది.
గ్రూప్-ఎ లో భారత్ (ర్యాంక్ 1), ఆస్ట్రేలియా (ర్యాంక్ 4), పాకిస్తాన్ (ర్యాంక్ 5), అఫ్గానిస్తాన్ (ర్యాంక్ 8), జింబాబ్వే (ర్యాంక్ 11) ఉన్నాయి. ఈ గ్రూప్‌లో మరో జట్టు కూడా ఉంది (క్వాలిఫైయర్ ఎ), కానీ అది ఇంకా ఖరారు కాలేదు.
క్వాలిఫైయర్ బి ఎవరో ఇంకా తెలియనందున దానిని మినహాయిస్తే.. గ్రూప్-బి జట్ల ర్యాంకింగ్స్ — న్యూజిలాండ్ (ర్యాంక్ 2), సౌతాఫ్రికా (ర్యాంక్ 3), ఇంగ్లాండ్ (ర్యాంక్ 6), శ్రీలంక (ర్యాంక్ 7), బంగ్లాదేశ్ (ర్యాంక్ 9) ఉన్నాయి.
ఐసీసీ జట్లకు ప్రి-సీడింగ్స్ కూడా ఇచ్చింది: భారత్ (A1), ఆస్ట్రేలియా (A2), పాకిస్తాన్ (A3), ఇంగ్లాండ్ (B4), న్యూజిలాండ్ (B1), సౌతాఫ్రికా (B2), శ్రీలంక (B3). ఈ ప్రి-సీడింగ్లు సాధారణ అంచనాల ఆధారంగా చేశారు. A1 అంటే భారత్ గ్రూప్-ఎ లో తప్పకుండా అగ్రస్థానంలో నిలుస్తుందని భావించినట్లు కాదు. ఈ ప్రి-సీడింగ్లు డ్రా ప్రయోజనాల కోసమే. ఒకవేళ భారత్ అర్హత సాధించలేకపోతే, భారత్ స్థానంలో వచ్చే జట్టుకు A1 సీడింగ్ లభిస్తుంది.
ప్రి-సీడింగ్స్ ప్రకారం చూస్తే.. అక్టోబర్ 10న గ్రూప్ దశలో తొలిసారి తలపడిన తర్వాత, సూపర్ 7s దశలో భారత్-పాకిస్తాన్ మ్యాచ్ నవంబర్ 7న కేప్‌టౌన్‌లో జరిగే అవకాశం ఉంది. అయితే ఈ మ్యాచ్ జరగడం అనేది ఇరు జట్లు సూపర్ 7s దశకు అర్హత సాధించడంపైనే ఆధారపడి ఉంటుంది. ఒకవేళ రెండు జట్లూ మరింత ముందుకు సాగితే సెమీఫైనల్స్ లేదా ఫైనల్స్‌లో మూడోసారి కూడా తలపడవచ్చు.
భారత్ ఆడబోయే ఇతర సూపర్ 7s మ్యాచ్‌లు: అక్టోబర్ 28న విక్టోరియా ఫాల్స్‌లో ఆస్ట్రేలియాతో, అక్టోబర్ 31న జోహన్నెస్‌బర్గ్‌లో సౌతాఫ్రికాతో, నవంబర్ 4న పార్ల్‌లో న్యూజిలాండ్‌తో, నవంబర్ 11న గెబెహా (పూర్వపు పోర్ట్ ఎలిజబెత్)లో ఇంగ్లాండ్‌తో, చివరగా నవంబర్ 14న డర్బన్‌లో శ్రీలంకతో జరగాల్సి ఉంది.
Also Read:ఇంటర్నేషనల్ కాఫీ డే..ప్రత్యేకం
భారత్, ఆస్ట్రేలియా, న్యూజిలాండ్, సౌతాఫ్రికా, పాకిస్తాన్, ఇంగ్లాండ్, శ్రీలంక జట్లు సూపర్ 7s దశకు చేరుకుంటాయనే అంచనాతో ఈ షెడ్యూల్‌ను రూపొందించారు.