భారతదేశంలో అత్యధిక ఆదాయం పొందే పన్ను చెల్లింపుదారుల సంఖ్య అపూర్వమైన వేగంతో పెరుగుతోంది. కేంద్ర ఆర్థిక మంత్రిత్వ శాఖ వెల్లడించిన గణాంకాల ప్రకారం.. ఏటా కనీసం రూ.100 కోట్ల ఆదాయాన్ని పొందుతున్న వ్యక్తుల సంఖ్య 2021 నుండి ఇప్పటివరకు 300% పైగా పెరిగింది. అయితే సంపన్నుల మొత్తం ఆస్తుల సంపదకు సంబంధించిన వివరాలను ప్రభుత్వం ప్రత్యేకంగా నిర్వహించడం లేదని తెలిపింది.
భారతదేశంలోని అత్యంత సంపన్నుల క్లబ్లో సభ్యుల సంఖ్య గణనీయంగా పెరిగింది. పార్లమెంటులో కేంద్ర ఆర్థిక మంత్రిత్వ శాఖ సమర్పించిన వివరాల ప్రకారం.. అసెస్మెంట్ ఇయర్ (AY) 2025-26లో ఏటా రూ.100 కోట్లు లేదా అంతకంటే ఎక్కువ రాబడి పొందుతున్నట్లు దాఖలు చేసిన నివేదికల సంఖ్య 576కి చేరింది. 2024-25 లో ఈ సంఖ్య 415గా ఉంది.
దేశంలో బిలియనీర్ల సంఖ్య పెరిగిందా అని అడిగిన ప్రశ్నకు సమాధానంగా కేంద్ర ఆర్థిక శాఖ సహాయ మంత్రి (MoS) పంకజ్ చౌదరి ఈ వివరాలను రాతపూర్వకంగా అందించారు. ఐదేళ్ల క్రితం AY 2021-22లో కేవలం 142 మంది పన్ను చెల్లింపుదారులు మాత్రమే ₹100 కోట్లు లేదా అంతకంటే ఎక్కువ వార్షిక ఆదాయాన్ని వెల్లడించారు. తాజా సంఖ్య 576 అనేది గత ఐదేళ్ల కాలంలో దేశంలోని అత్యధిక ఆదాయ పన్ను చెల్లింపుదారుల సంఖ్యలో 300% కంటే ఎక్కువ పెరుగుదలను సూచిస్తుంది.
ఈ సంఖ్యలు మధ్యలో చిన్న తగ్గుదల మినహా స్థిరంగా పెరుగుతూ వచ్చాయి. AY 2021-22లో 142గా ఉన్న ఈ సంఖ్య, AY 2022-23 నాటికి 301కి పెరిగింది. ఆ తర్వాత AY 2023-24లో స్వల్పంగా తగ్గి 284కి చేరింది. ఆపై AY 2024-25లో 415కి చేరుకుని, AY 2025-26 నాటికి 576కి ఎగబాకింది.భారతీయ బిలియనీర్ల మొత్తం సంపద మరియు గత ఐదేళ్లలో అందులో వచ్చిన మార్పులపై ప్రభుత్వం వద్ద డేటా ఉందా అని అడిగిన ప్రశ్నకు.. అటువంటి అధికారిక సమాచారాన్ని ప్రభుత్వం నిర్వహించడం లేదని చౌదరి సమాధానమిచ్చారు.
భారతదేశపు ప్రగతిశీల ఆదాయపు పన్ను విధానం ప్రకారం అత్యధిక ఆదాయం ఉన్న వ్యక్తులు సాధారణ ఆదాయపు పన్నుతో పాటు అదనపు సర్ఛార్జ్ను కూడా చెల్లించాల్సి ఉంటుందని మంత్రిత్వ శాఖ స్పష్టం చేసింది.ఉపాధి, స్టార్టప్లు, సహకార సంఘాలు మరియు మౌలిక సదుపాయాల కల్పనకు పన్ను మినహాయింపులు ఇస్తున్నామని, అలాగే పిఎం ఆవాస్ యోజన, పిఎం జన్ ధన్ యోజన, పిఎం-కిసాన్, ఆయుష్మాన్ భారత్ మరియు జల్ జీవన్ మిషన్ వంటి ప్రధాన పథకాలను ప్రభుత్వం అమలు చేస్తోందని ప్రస్తావించింది.
Also Read;‘ప్రధాన్’ను తీసేసి ‘ప్రధాని’ని కాపాడుకున్నారు!