ఎఫ్‌డీ లేదా మ్యూచువల్ ఫండ్స్ ఏది బెటర్?

చాలామంది తాము కష్టపడి సంపాదించిన డబ్బు సురక్షితంగా ఉండాలని ఫిక్స్‌డ్ డిపాజిట్లు (FDలు), పీపీఎఫ్ (PPF) లేదా సాధారణ బ్యాంక్ సేవింగ్స్ అకౌంట్లలో దాచుకుంటారు. అయితే ఈ సాంప్రదాయ పొదుపు పద్ధతులు మీ డబ్బును భద్రంగా ఉంచినప్పటికీ ద్రవ్యోల్బణం నుండి కాపాడలేవు. ద్రవ్యోల్బణం అనేది ఇనుముకు పట్టే తుప్పు లాంటిది. అది మీ డబ్బు యొక్క కొనుగోలు శక్తిని సైలెంట్‌గా తగ్గించేస్తుంది. ఈ నేపథ్యంలో దీర్ఘకాలంలో ద్రవ్యోల్బణాన్ని అధిగమించి సంపదను సృష్టించడానికి మ్యూచువల్ ఫండ్స్ ఎలా సహాయపడతాయో నిపుణులు వివరిస్తున్నారు.

ఉదాహరణకు మీరు ఒక బ్యాంకు ఎఫ్‌డీలో డబ్బు దాచారు. దానిపై ఏడాదికి 7% వడ్డీ వస్తోంది అనుకుందాం. అదే సమయంలో దేశంలో ద్రవ్యోల్బణం రేటు 6% ఉంటే, మీ నిజమైన రాబడి కేవలం 1% మాత్రమే. ద్రవ్యోల్బణం రేటు పెరిగే కొద్దీ సాంప్రదాయ పథకాలలో మీ డబ్బు విలువ వాస్తవంగా క్షీణిస్తుంది. ఇవాల్టి రూ. 10,000 విలువ 7% ద్రవ్యోల్బణం ప్రకారం చూస్తే 20 ఏళ్ల తర్వాత కేవలం రూ. 2,584 కి సమానమవుతుంది. అంటే మీ పొదుపు పెరిగినట్లు కనిపిస్తున్నా దాని కొనుగోలు శక్తి పడిపోతుంది.

దీర్ఘకాలంలో ద్రవ్యోల్బణాన్ని మించి రాబడులను ఇచ్చే ఏకైక అసెట్ క్లాస్ ఈక్విటీ (షేర్ మార్కెట్). ఈక్విటీ మ్యూచువల్ ఫండ్స్ గత కొన్ని ఏళ్లలో సగటున 13% నుండి 15% వరకు వార్షిక రాబడిని అందించాయి. ద్రవ్యోల్బణం పెరిగినప్పుడు కంపెనీలు తమ వస్తువులు, సేవల ధరలను పెంచుతాయి. దీనివల్ల వాటి ఆదాయాలు, షేర్ ధరలు పెరిగి మ్యూచువల్ ఫండ్స్ ఇన్వెస్టర్లకు ఎక్కువ లాభాలు అందుతాయి.

మ్యూచువల్ ఫండ్స్ మీ పెట్టుబడిని కేవలం ఒకే చోట ఉంచకుండా వేర్వేరు కంపెనీలు, రంగాలు (ఐటీ, ఫార్మా, బ్యాంకింగ్) మరియు అసెట్స్ (గోల్డ్, డెట్, ఈక్విటీ) లలో విభజిస్తాయి. దీనివల్ల మార్కెట్ హెచ్చుతగ్గుల వల్ల కలిగే నష్టభయం తగ్గి, స్థిరమైన రాబడి వచ్చే అవకాశం పెరుగుతుంది.

సిస్టమాటిక్ ఇన్వెస్ట్‌మెంట్ ప్లాన్ (SIP) ద్వారా ప్రతి నెలా ఒక నిర్ణీత మొత్తాన్ని క్రమశిక్షణతో పెట్టుబడి పెట్టవచ్చు. మార్కెట్ పడిపోయినప్పుడు ఎక్కువ మ్యూచువల్ ఫండ్ యూనిట్లు, మార్కెట్ పెరిగినప్పుడు తక్కువ యూనిట్లు కొనుగోలు అవుతాయి. ఈ విధానాన్ని ‘రూపీ-కాస్ట్ యావరేజింగ్’ అంటారు. ఇది స్వల్పకాలిక మార్కెట్ ఒడిదుడుకుల ప్రభావాన్ని తగ్గించి, ద్రవ్యోల్బణాన్ని తట్టుకునేలా సంపదను పెంచుతుంది.

Also Read:TMC:ఈసీ ముందుకు టీఎంసీ సంక్షోభం!

ఈక్విటీ మ్యూచువల్ ఫండ్స్‌లో ఏడాది కంటే ఎక్కువ కాలం పెట్టుబడులను కొనసాగిస్తే లభించే లాభాలపై పన్ను మినహాయింపులు (లేదా తక్కువ పన్ను) ఉంటాయి. ఇది సాంప్రదాయ ఎఫ్‌డీలతో (ఇక్కడ వడ్డీపై మీ టాక్స్ స్లాబ్ ప్రకారం పన్ను పడుతుంది) పోలిస్తే ఇన్వెస్టర్ చేతికి వచ్చే నికర లాభాన్ని పెంచుతుంది.భద్రత ముఖ్యం అనుకుంటూ కేవలం బ్యాంక్ ఎఫ్‌డీలపైనే పూర్తిగా ఆధారపడితే భవిష్యత్తులో పెరిగే జీవన వ్యయాన్ని అందుకోవడం కష్టమవుతుంది. అందువల్ల, మీ ఆర్థిక లక్ష్యాలు, రిస్క్ తీసుకునే సామర్థ్యానికి అనుగుణంగా మ్యూచువల్ ఫండ్స్‌లో SIP ద్వారా పెట్టుబడి పెట్టడం ద్వారా ద్రవ్యోల్బణం అనే రాక్షసిని సులువుగా ఓడించవచ్చని నిపుణులు సూచిస్తున్నారు.