స్వల్ప అస్వస్థత కారణంగా హాస్పిటల్లో చేరారు దర్శకురాలు సంజనారెడ్డి. మూడు రోజులగా లిక్విడ్ డైట్ తీసుకుంటున్న సంజనా..కళ్లు తిరిగిపడిపోవడంతో ఆమెను వెంటనే ఆస్పత్రికి తరలించారు. ప్రస్తుతం సంజనా పరిస్ధితి నిలకడగానే ఉంది. ఆమె ఆరోగ్యంపై వస్తున్న పుకార్లను నమ్మవద్దని విజ్ఞప్తి చేశారు రైటర్ కోన వెంకట్.
2018లో రాజ్ తరుణ్ హీరోగా వచ్చిన రాజుగాడు సినిమాతో టాలీవుడ్‌కు దర్శకురాలిగా పరిచయమయ్యారు సంజన . ప్రస్తుతం భారత్ తరఫున ఒలింపిక్ గేమ్స్‌లో పతకం గెలిచిన తొలి మహిళా క్రీడాకారిణి కరణం మల్లేశ్వరి బయోపిక్‌ని తెరకెక్కిస్తున్నారు. సంజన స్వస్థలం కూడా మల్లీశ్వరి పుట్టినగ్రామం కావడం విశేషం.
పాన్-ఇండియా మూవీగా ఈ సినిమా తెరకెక్కనుండగా ఎంవీవీ సినిమా, కోనా ఫిల్మ్ ఫ్యాక్టరీ బ్యానర్లపై ఎంవీవీ సత్యనారాయణ, కోన వెంకట్ ఈ చిత్రాన్ని నిర్మిస్తున్నారు. ఈ చిత్రానికి డైలాగులు కోన వెంకటే రాస్తున్నారు.
