సూపర్ స్టార్ మహేష్ బాబు అభిమానులతో ట్విట్టర్లో తలెత్తిన వివాదంపై దర్శకుడు హరీష్ శంకర్ క్లారిటీ ఇచ్చి క్షమాపణలు తెలిపారు. ‘ఉస్తాద్ భగత్ సింగ్’ సినిమా ప్రమోషన్స్ సమయంలో జరిగిన ఒక చిన్న పొరపాటు ఈ వివాదానికి కారణమైందని ఆయన వెల్లడించారు.
వివరాల ప్రకారం, పవర్ స్టార్ పవన్ కళ్యాణ్ అభిమానిలో ఒకరు ఎక్స్ (ట్విట్టర్) వేదికగా ‘ఉస్తాద్ భగత్ సింగ్’ సినిమా మహేష్ బాబు రికార్డులను బద్దలు కొట్టాలని సూచించేలా ఒక పోస్టు చేశారు. ఆ పోస్టుకు హరీష్ శంకర్ స్పందించడంతో మహేష్ బాబు అభిమానులు తీవ్ర ఆగ్రహం వ్యక్తం చేస్తూ సోషల్ మీడియాలో ఆయనపై ట్రోలింగ్ ప్రారంభించారు.
ఈ వివాదం పెరగడంతో హరీష్ శంకర్ వెంటనే స్పందించారు. షూటింగ్ పనులు మరియు సెన్సార్ కార్యక్రమాలతో బిజీగా ఉండటం వల్ల ఆ ట్వీట్ను పూర్తిగా చదవకుండా, కేవలం అభిమాని ఉత్సాహాన్ని చూసి పొరపాటున రిప్లై ఇచ్చానని చెప్పారు.
మహేష్ బాబు పట్ల తనకు ఎంతో గౌరవం ఉందని ఆయన స్పష్టం చేశారు. గతంలో మహేష్ బాబు నటించిన పోకిరి సినిమా గురించి తాను ఎంతో పాజిటివ్గా మాట్లాడిన విషయాన్ని కూడా గుర్తుచేశారు. అలాగే దర్శకుడు రాజమౌళి – మహేష్ బాబు కాంబినేషన్లో రాబోయే సినిమా భారీ విజయాన్ని సాధించాలని తాను హృదయపూర్వకంగా కోరుకుంటున్నానని తెలిపారు.
తన రిప్లై వల్ల ఎవరి మనోభావాలైనా దెబ్బతిన్నట్లయితే బేషరతుగా క్షమాపణలు కోరుతున్నానని హరీష్ శంకర్ చెప్పారు. సినిమా విడుదల సమయం దగ్గరపడుతున్న సమయంలో కావాలని ఇలాంటి వివాదాలు సృష్టించే వ్యక్తిని తాను కాదని కూడా ఆయన స్పష్టం చేశారు.
Also Read:వార్ ఎఫెక్ట్..యూరియాపై కూడా!