ఐఫోన్‌ ఆర్డర్ చేస్తే నూనె బాటిల్ వచ్చింది!

ఆన్‌లైన్ షాపింగ్ సంస్థ ఫ్లిప్‌కార్ట్‌లో ఐఫోన్ (iPhone) ఆర్డర్ చేస్తే దానికి బదులుగా గడ్డం పెంచే నూనె పంపిన ఉదంతంలో ముంబై వినియోగదారుల కోర్టు సంచలన తీర్పునిచ్చింది. బాధితుడికి ఐఫోన్ ధర అయిన రూ. 1.11 లక్షలకు పైగా సొమ్మును రీఫండ్ చేయడంతో పాటు, మానసిక వేదన మరియు కోర్టు ఖర్చుల కింద రూ. 70,000 నష్టపరిహారం చెల్లించాలని ఫ్లిప్‌కార్ట్ మరియు దాని విక్రేత (సెల్లర్)ను ఆదేశించింది.

ముంబై (సబర్బన్) అదనపు డిస్ట్రిక్ట్ కన్స్యూమర్ డిస్ప్యూట్స్ రెడ్రెసల్ కమిషన్ ఈ నెల ప్రారంభంలో ఇచ్చిన తీర్పులో— బాధితుడి ఫిర్యాదులను ఏ పరిష్కారమూ చూపకుండా పదేపదే క్లోజ్ చేయడం కిందకే వస్తుందని పేర్కొంది. తగిన చెల్లింపులు చేసిన తర్వాతే ఆన్‌లైన్ ప్లాట్‌ఫామ్ ద్వారా ఆర్డర్ నమోదైందని కోర్టు గుర్తించింది.

అందువల్ల ఆర్డర్ చేసిన వస్తువే వినియోగదారునికి చేరేలా చూడటం, ఒకవేళ సమస్యలు వస్తే పరిష్కరించే సమర్థవంతమైన వ్యవస్థను అందించడం మొదటి ప్రతివాది (ఫ్లిప్‌కార్ట్) కనీస బాధ్యత అని కమిషన్ స్పష్టం చేసింది. అమ్మకానికి వేదికగా నిలిచినంత మాత్రాన ఒక ఈ-కామర్స్ సంస్థ తన బాధ్యత నుండి తప్పుకోలేదని, ముఖ్యంగా వినియోగదారుడు తనకు తప్పుడు వస్తువు వచ్చిందని వెంటనే ఫిర్యాదు చేసినప్పుడు మరింత బాధ్యతాయుతంగా వ్యవహరించాలని కోర్టు పేర్కొంది.

ఫిర్యాదుపై విచారణ జరపకపోవడం, తప్పుగా డెలివరీ అయిన పార్శిల్‌ను వెనక్కి తీసుకోకపోవడం, రీఫండ్ లేదా రీప్లేస్‌మెంట్ ఇవ్వకపోవడం మరియు బాధితుడి ఫిర్యాదులను పరిష్కరించకుండానే పదేపదే మూసివేయడం తీవ్రమైన “సేవా లోపం” కిందకే వస్తుందని వ్యాఖ్యానించింది.

అలాగే, ఈ ఒప్పందంలో భాగమైన ‘ఇంటర్నేషనల్ వాల్యూ రిటైల్ ప్రైవేట్ లిమిటెడ్’ అనే విక్రేత (సెల్లర్) కూడా కొనుగోలు చేసిన వస్తువును అందించడంలో, వినియోగదారుని సమస్యను పరిష్కరించడంలో విఫలమైందని కోర్టు నిర్ధారించింది. అందువల్ల ఫిర్యాదుదారునికి కలిగిన నష్టానికి, అసౌకర్యానికి ఫ్లిప్‌కార్ట్ మరియు సెల్లర్ ఇద్దరూ సంయుక్తంగా బాధ్యత వహించాలని తీర్పునిచ్చింది.

ముంబైలోని పవాయ్ ప్రాంతానికి చెందిన ఒక కస్టమర్ ఏప్రిల్ 22, 2023న ఫ్లిప్‌కార్ట్ ద్వారా నో-కాస్ట్ ఈఎమ్‌ఐ (No-cost EMI) పద్ధతిలో రూ. 1,11,793 విలువైన Apple iPhone 14 Pro (128 GB) ను ఆర్డర్ చేశారు.విడివిడిగా ఆర్డర్ చేసిన ఛార్జర్, కవర్ సరిగ్గానే డెలివరీ అయినప్పటికీ, మరుసటి రోజు వచ్చిన ప్రధాన పార్శిల్‌లో ఖరీదైన స్మార్ట్‌ఫోన్‌కు బదులుగా “బియర్డ్ గ్రోత్ ఆయిల్” (గడ్డం పెంచే నూనె) మరియు ప్యాకింగ్ మెటీరియల్ మాత్రమే ఉన్నాయి.

Also Read:వైభవ్‌పై శ్రేయాస్ ప్రశంసలు

ఏప్రిల్ మరియు మే 2023 మధ్య ఫ్లిప్‌కార్ట్ కస్టమర్ కేర్‌ను పదేపదే సంప్రదించి, అడిగిన పత్రాలన్నీ సమర్పించినప్పటికీ కంపెనీ ఏమాత్రం స్పందించలేదని బాధితుడు ఆరోపించారు. రీఫండ్ లేదా రీప్లేస్‌మెంట్ ఇవ్వకుండానే ఫిర్యాదును పరిష్కరించబడింది అని మార్కింగ్ చేస్తూ వచ్చారు.

ఈ కేసును విచారించిన వినియోగదారుల ఫోరమ్— ఐఫోన్ అసలు ధర అయిన రూ. 1,11,793 మొత్తాన్ని ఏప్రిల్ 22, 2023 నుండి వార్షిక 9 శాతం వడ్డీతో కలిపి బాధితుడికి రీఫండ్ చేయాలని ఆదేశించింది. దీంతో పాటు, మానసిక వేదనకు గాను రూ. 50,000 నష్టపరిహారం, కోర్టు ఖర్చుల కింద రూ. 20,000 లను 45 రోజుల్లోగా చెల్లించాలని స్పష్టం చేసింది.