కాంగ్రెస్ ఎమ్మెల్యే శ్రీధర్‌ బాబుకు కరోనా..

తెలంగాణలో కరోనా పాజిటివ్ కేసుల సంఖ్య 2 లక్షల 45 వేలు దాటిన సంగతి తెలిసిందే. ఇప్పటికే పలువురు ప్రజాప్రతినిధులకు కరోనా పాజిటివ్ రాగా తాజాగా కాంగ్రెస్ సీనియర్ నేత, మంథని ఎమ్మెల్యే దుద్దిళ్ల శ్రీధర్‌బాబు కరోనా వైరస్‌కు పాజిటివ్‌గా తేలింది.

ఈ విషయాన్ని ట్విట్టర్ ద్వారా వెల్లడించారు శ్రీధర్ బాబు. తన వ్యక్తిగత సిబ్బందితో పాటు తనకు కొవిడ్‌ రిపోర్ట్‌లో పాజిటివ్‌గా వచ్చిందని తెలిపారు. అభిమానులు ఎవరూ ఆందోళన చెందవద్దని తనతో పాటు తన సిబ్బంది క్వారంటైన్‌లో ఉన్నట్లు శ్రీధర్ బాబు వెల్లడించారు.

గత 24 గంటల్లో 1539 కరోనా పాజిటివ్ కేసులు నమోదుకాగా 5గురు మృతిచెందారు. దీంతో కరోనా కేసుల సంఖ్య 2,45,682కి చేరింది. ప్రస్తుతం రాష్ట్రంలో 18,566 కేసులుండగా కరోనా నుండి 2,25,664 మంది కోలుకొని డిశ్చార్జ్ అయ్యారు. ఇప్పటివరకు రాష్ట్రంలో కరోనాతో 1362 మంది మృతిచెందారు