తమిళనాడులో ఆవులు, దూడల వధపై మద్రాస్ హైకోర్టు ఇచ్చిన ఆదేశాలను సుప్రీంకోర్టు సోమవారం నిలిపివేసింది. బక్రీద్ సందర్భంగా మాత్రమే కాకుండా ఇతర రోజుల్లోనూ రాష్ట్రంలో ఎక్కడా ఆవు లేదా దూడను వధించకుండా చర్యలు తీసుకోవాలని హైకోర్టు ఇచ్చిన ఆదేశాలకు సర్వోన్నత న్యాయస్థానం స్టే విధించింది.
ముఖ్యమంత్రి విజయ్ నేతృత్వంలోని తమిళగ వెట్రి కళగం (టీవీకే) ప్రభుత్వం మద్రాస్ హైకోర్టు మే 27న ఇచ్చిన తీర్పును సవాలు చేస్తూ సుప్రీంకోర్టులో ప్రత్యేక అనుమతి పిటిషన్ (ఎస్ఎల్పీ) దాఖలు చేసింది.
రాష్ట్ర ప్రభుత్వం తన వాదనలో, ప్రస్తుతం అమల్లో ఉన్న చట్టాలు కొన్ని నిర్దిష్ట వర్గాలకు చెందిన పశువులను గుర్తించిన వధశాలల్లో చట్టబద్ధంగా వధించేందుకు అనుమతిస్తున్నాయని పేర్కొంది. అలాంటి పరిస్థితిలో చట్ట నిబంధనలకు విరుద్ధంగా పూర్తిస్థాయి నిషేధం విధించాలని న్యాయస్థానం ఆదేశించడం సమంజసం కాదని వాదించింది.
రాష్ట్ర ప్రభుత్వ వాదనలను పరిశీలించిన సుప్రీంకోర్టు, హైకోర్టు ఆదేశాన్ని ప్రస్తుతం అమలు చేయకుండా నిలిపివేస్తూ, దీనిని సరిదిద్దాల్సిన అవసరం ఉందని వ్యాఖ్యానించింది. తదుపరి విచారణ వరకు హైకోర్టు ఆదేశాలు అమల్లో ఉండవని స్పష్టం చేసింది.మద్రాస్ హైకోర్టు న్యాయమూర్తులు జీఆర్ స్వామినాథన్, వి. లక్ష్మీనారాయణన్లతో కూడిన ధర్మాసనం 1976లో తమిళనాడు ప్రభుత్వం జారీ చేసిన ఉత్తర్వులను ఆధారంగా తీసుకుని ఈ ఆదేశాలు జారీ చేసింది. పాల ఉత్పత్తి పెంపు, గ్రామీణ ఆర్థిక వ్యవస్థ అభివృద్ధి దృష్ట్యా ఆవుల వధను నిరోధించాలనే ఉద్దేశంతో ఆ ఉత్తర్వులు జారీ అయ్యాయి.
తీర్పు రచించిన న్యాయమూర్తి జీఆర్ స్వామినాథన్, భారత రాజ్యాంగంలోని ఆర్టికల్ 48 ప్రకారం ఆవులు, దూడలు, పాలిచ్చే మరియు వ్యవసాయ పనులకు ఉపయోగించే పశువుల వధను నిరోధించే చర్యలు తీసుకోవాలని రాష్ట్రాలకు సూచించబడిందని పేర్కొన్నారు. రాజ్యాంగ రూపకల్పన సమయంలో కూడా ఆవును భారతీయ సంస్కృతిలో గౌరవనీయమైన జంతువుగా అభివర్ణించిన విషయాన్ని ఆయన గుర్తు చేశారు.
బక్రీద్ సందర్భంగా ముస్లింలు స్థానిక నిబంధనలకు అనుగుణంగా జంతు బలి నిర్వహించడం ఆనవాయితీ. అదే విధంగా తమిళనాడులోని కొన్ని హిందూ దేవాలయాల్లో వార్షిక ఉత్సవాల సమయంలో కూడా సంప్రదాయబద్ధంగా జంతు బలులు ఇస్తుంటారు. ఈ సందర్భంగా బలులను కేవలం లైసెన్స్ పొందిన వధశాలల్లోనే నిర్వహించాలని చెప్పడం ఆచరణలో సాధ్యం కాదని పలువురు సామాజిక నాయకులు అభిప్రాయపడుతున్నారు.
Also Read:ఇంగ్లాండ్తో వన్డేలు..టీమిండియా మార్పులు!
తమిళనాడు ప్రభుత్వం మాత్రం ప్రస్తుతం అమల్లో ఉన్న తమిళనాడు జంతు సంరక్షణ చట్టంతో పాటు వధశాలల నిర్వహణకు సంబంధించిన ఇతర నిబంధనల ద్వారా జంతువుల వధ ఎక్కడ, ఏ పరిస్థితుల్లో జరగాలో ఇప్పటికే స్పష్టమైన నియంత్రణలు ఉన్నాయని తెలిపింది. అయితే ఈ చట్టాలు రాష్ట్రవ్యాప్తంగా పూర్తిస్థాయి నిషేధాన్ని విధించడం లేదని ప్రభుత్వం సుప్రీంకోర్టుకు వివరించింది.