దేశ అత్యున్నత న్యాయస్థానంలో పేరుకుపోయిన కేసుల భారాన్ని తగ్గించేందుకు కేంద్ర ప్రభుత్వం కీలక అడుగు వేసింది. సుప్రీంకోర్టు న్యాయమూర్తుల సంఖ్యను ప్రస్తుతం ఉన్న 34 నుండి 38కి పెంచాలనే ప్రతిపాదనకు ప్రధానమంత్రి నరేంద్ర మోదీ నేతృత్వంలోని కేంద్ర మంత్రివర్గం మంగళవారం ఆమోదం తెలిపింది.
సుప్రీంకోర్టులో ప్రస్తుతం వేల సంఖ్యలో కేసులు పెండింగ్లో ఉన్నాయి. న్యాయమూర్తుల సంఖ్యను పెంచడం ద్వారా ఈ కేసుల విచారణ వేగవంతం అవుతుందని ప్రభుత్వం భావిస్తోంది. కీలకమైన రాజ్యాంగ అంశాలపై విచారణ జరిపేందుకు మరిన్ని ధర్మాసనాలను (Benches) ఏర్పాటు చేసే వీలు కలుగుతుంది.
ప్రస్తుతం ఉన్న న్యాయమూర్తులపై ఉన్న విపరీతమైన పని ఒత్తిడిని తగ్గించి, న్యాయ ప్రక్రియను మరింత సమర్థవంతంగా మార్చడమే ఈ నిర్ణయం వెనుక ఉన్న ఉద్దేశం. న్యాయమూర్తుల సంఖ్యను పెంచడానికి ‘సుప్రీంకోర్టు (న్యాయమూర్తుల సంఖ్య) చట్టం, 1956’కు సవరణ చేయాల్సి ఉంటుంది.
కేబినెట్ ఆమోదం పొందిన ఈ బిల్లును త్వరలోనే పార్లమెంటులో ప్రవేశపెట్టనున్నారు. ఉభయ సభల ఆమోదం పొందిన తర్వాత రాష్ట్రపతి సంతకంతో ఇది చట్టంగా మారుతుంది. చట్టం అమల్లోకి వచ్చిన తర్వాత, కొలీజియం సిఫార్సుల మేరకు నలుగురు కొత్త న్యాయమూర్తులను నియమించే ప్రక్రియ ప్రారంభమవుతుంది. గతంలో 2019లో సుప్రీంకోర్టు న్యాయమూర్తుల సంఖ్యను 31 నుండి 34కి (ముఖ్య న్యాయమూర్తితో కలిపి) పెంచారు. ఇప్పుడు మళ్లీ ఏడేళ్ల తర్వాత న్యాయవ్యవస్థ బలోపేతం కోసం ఈ నిర్ణయం తీసుకోవడం విశేషం.
Also Read:‘హిట్మ్యాన్’పై ప్రశంసల జల్లు!