రోగుల ప్రయోజనాలను కాపాడేందుకు మరియు వైద్య సేవల్లో పారదర్శకతను పెంచేందుకు కేంద్ర ప్రభుత్వం కీలక నిర్ణయం తీసుకుంది. ఇకపై ప్రతి క్లినిక్ మరియు ఆసుపత్రిలో వైద్యుల ఫీజులను స్పష్టంగా ప్రదర్శించాలని కేంద్రం ఆదేశించింది.
క్లినిక్స్ లేదా ఆసుపత్రుల రిసెప్షన్ వద్ద లేదా రోగులకు స్పష్టంగా కనిపించే చోట వివిధ వైద్య సేవలకు వసూలు చేసే ఫీజుల వివరాలను బోర్డుపై ప్రదర్శించడం ఇప్పుడు తప్పనిసరి.
వైద్య కేంద్రాల్లో కనీస ప్రమాణాలను (Clinic Standards) పాటించాలని, సరైన వసతులు లేని చోట వైద్య సేవలు అందించకూడదని కేంద్రం స్పష్టం చేసింది.వైద్యం అందించే సమయంలో రోగుల భద్రతకు అత్యంత ప్రాధాన్యత ఇవ్వాలని, అత్యవసర సమయాల్లో అనుసరించాల్సిన ప్రోటోకాల్స్ను కచ్చితంగా పాటించాలని నిబంధనల్లో పేర్కొన్నారు.
వైద్య సేవలకు సంబంధించి రోగుల నుంచి అదనపు వసూళ్లు చేయకుండా చూసేందుకు, ముందే ధరల పట్టికను అందుబాటులో ఉంచాలని ప్రభుత్వం భావిస్తోంది.
చాలా ప్రైవేట్ క్లినిక్స్ మరియు చిన్న ఆసుపత్రుల్లో ధరల విషయంలో స్పష్టత ఉండటం లేదని, చికిత్స పూర్తయ్యాక భారీ బిల్లులు వేస్తున్నారని అనేక ఫిర్యాదులు రావడంతో కేంద్ర ఆరోగ్య మంత్రిత్వ శాఖ ఈ చర్యలు చేపట్టింది.
వైద్యం అనేది సామాన్యులకు అందుబాటులో ఉండాలి. సేవల ధరలు ముందే తెలియడం వల్ల రోగులు తమ ఆర్థిక స్థితికి అనుగుణంగా నిర్ణయం తీసుకోగలుగుతారు అని ప్రభుత్వ వర్గాలు తెలిపాయి. ఈ నిబంధనలను ఉల్లంఘించే క్లినిక్కులపై కఠిన చర్యలు తీసుకుంటామని ప్రభుత్వం హెచ్చరించింది. రాష్ట్ర ప్రభుత్వాల సహకారంతో ఈ నిబంధనల అమలును క్షేత్రస్థాయిలో పర్యవేక్షించనున్నారు.
ఈ నిర్ణయం వల్ల వైద్య రంగంలో జవాబుదారీతనం పెరుగుతుందని మరియు రోగుల దోపిడీకి అడ్డుకట్ట పడుతుందని నిపుణులు అభిప్రాయపడుతున్నారు.
Also Read:విద్వేషపూరిత ప్రసంగాలపై సుప్రీం!