దుబాయ్ నుండి టెల్ అవీవ్ వెళ్తున్న విమానంలో 174 మంది ప్రయాణికులు ఉన్న సమయంలో, కో-పైలట్ కత్తితో దాడి చేసి తీవ్రంగా గాయపరిచినప్పటికీ భారతీయ పైలట్ కెప్టెన్ స్మిత్ మచ్చార్ అపారమైన ధైర్యసాహసాలు ప్రదర్శించి పెద్ద ప్రమాదాన్ని తప్పించారు. ఈ ఘటన అంతర్జాతీయ వ్యాప్తంగా ప్రధాన వార్తా కథనంగా నిలిచింది.
తీవ్ర గాయాలైనప్పటికీ మచ్చార్ ఎదురుతిరిగి పోరాడి కాక్‌పిట్ తలుపు తెరిచారు. దీంతో ప్రయాణికులు, క్యాబిన్ సిబ్బంది లోపలికి వచ్చి దాడి చేసిన వ్యక్తిని లొంగదీసుకున్నారు. ఆ తర్వాత విమానాన్ని సౌదీ అరేబియాలోని తబుక్‌కు మళ్లించి సురక్షితంగా ల్యాండ్ చేశారు. 174 మంది ప్రాణాలను కాపాడిన మచ్చార్‌ను ఇజ్రాయెల్ ప్రధాని బెంజమిన్ నెతన్యాహు “నిజమైన హీరో” అని కొనియాడారు. ప్రపంచవ్యాప్తంగా ఉన్న ప్రధాన వార్తా సంస్థలు ఈ ఘటనను ప్రముఖంగా ప్రచురించాయి.
CNN: కాక్‌పిట్ ఘర్షణ సమయంలో చొరవ చూపిన మచ్చార్ మరియు ప్రయాణికులను ‘హీరోలు’గా అభివర్ణించింది. దుబాయ్-టెల్ అవీవ్ విమానాన్ని హైజాక్ చేయడానికి జరిగిన ప్రయత్నాన్ని వీరు అడ్డుకున్నారని పేర్కొంది.
The Guardian: విమానాన్ని కూల్చివేసేందుకు యత్నించిన దాడికోరు నుంచి నియంత్రణ సాధించినందుకు మచ్చార్‌ను హీరోగా కొనియాడింది.
BBC: “ఇజ్రాయెల్ వెళ్తున్న విమానంలో కత్తిపోట్లకు గురైన భారతీయ ‘హీరో’ పైలట్ ఎవరు?” అంటూ ప్రత్యేక కథనాన్ని ప్రచురించింది.
Reuters: “టెక్స్‌టైల్ ఇంజనీరింగ్ నుండి కాక్‌పిట్ హీరో వరకు: ఫ్లైదుబాయ్ డ్రామా తర్వాత ప్రశంసలు అందుకుంటున్న భారతీయ పైలట్” అనే శీర్షికతో ఆయన ప్రస్థానాన్ని వివరించింది.
Associated Press (AP): ఫ్లైదుబాయ్ విమానంలో జరిగిన కాక్‌పిట్ దాడి కథనంలో మచ్చార్‌ను ఒక హీరోగా అభివర్ణించింది.
The New York Times: “హీరోగా ప్రశంసలు అందుకుంటున్న ఫ్లైదుబాయ్ పైలట్ ఎవరు?” అనే శీర్షికతో ప్రొఫైల్ కథనాన్ని ప్రచురించింది.
The New York Post: పైలట్ భారత పౌరుడని పేర్కొంటూ, కో-పైలట్‌తో జరిగిన పోరాటంపై దృష్టి సారించింది.
The Washington Post: కత్తిపోట్ల ఘటన తర్వాత మచ్చార్ హీరోగా నిలిచారని నివేదించింది.
The Times of Israel: పైలట్ మరియు ప్రయాణికుల పాత్రను కొనియాడుతూ, విమానాన్ని కూల్చివేసే యత్నాన్ని అడ్డుకున్న గాల్లో జరిగిన “అద్భుతం”గా అభివర్ణించింది.
Also Read:దానంకు ఎంపీ..నాకు ఎమ్మెల్యే టికెట్!
కెప్టెన్ స్మిత్ మచ్చార్ దుబాయ్‌కు చెందిన ఫ్లైదుబాయ్‌లో డైరెక్ట్-ఎంట్రీ కెప్టెన్‌గా పనిచేస్తున్న అనుభవజ్ఞుడైన కమర్షియల్ పైలట్. ఆయనకు కమర్షియల్ ఏవియేషన్‌లో 13 ఏళ్లకు పైగా అనుభవం ఉండి, దాదాపు 9,750 గంటల విమాన ప్రయాణ అనుభవం ఉంది. ఇందులో ఎక్కువ భాగం బోయింగ్ 737 విమానాలపైనే కావడం గమనార్హం.
ఈ జూన్ 2022లో ఫ్లైదుబాయ్‌లో చేరడానికి ముందు ఆయన భారతీయ విమానయాన సంస్థ ‘స్పైస్‌జెట్’లో దాదాపు 11 సంవత్సరాలు సేవలందించారు. అక్కడ సీనియర్ కమాండర్‌గా, లైన్ ట్రైనింగ్ కెప్టెన్‌గా పనిచేసారు. కొడుకు గాయపడ్డాడని తెలుసుకున్న ఆయన తల్లిదండ్రులు తబుక్‌కు చేరుకున్నారు. ఆయన సోదరుడు కూడా ఇటీవలే ఫ్లైదుబాయ్‌లో పైలట్‌గా చేరినట్లు నివేదికలు తెలిపాయి.
దుబాయ్ నుండి టెల్ అవీవ్ వెళ్తున్న ఫ్లైదుబాయ్ విమానం FZ1073 బుధవారం అత్యవసర సంకేతాలను పంపింది. 34,000 అడుగుల ఎత్తులో ఉన్న విమానం ఒక్కసారిగా 17,000 అడుగులకు దిగివచ్చి సౌదీ అరేబియాలోని తబుక్ నగరంలోని ప్రిన్స్ సుల్తాన్ బిన్ అబ్దెల్ అజీజ్ విమానాశ్రయానికి మళ్లించబడింది. ఈ విమానంలో 27 మంది పిల్లలతో సహా మొత్తం 174 మంది ప్రయాణికులు ఉన్నారు.
సోషల్ మీడియాలో సర్క్యులేట్ అవుతున్న వీడియోల్లో పైలట్ రక్తసిక్తమై, ఆక్సిజన్ మాస్క్ ధరించి విమానం గాలీ భాగంలో పడి ఉండటం కనిపించింది. విమానం తబుక్ విమానాశ్రయంలో సురక్షితంగా ల్యాండ్ అయిందని, ప్రయాణికులందరూ సురక్షితంగా ఉన్నారని నెతన్యాహు తెలిపారు.