కేంద్ర హోంమంత్రి అమిత్ షా హర్యానాలోని కర్నాల్‌లో బీజేపీ నిర్వహించిన పాదయాత్రకు నాయకత్వం వహించారు. ప్రజాస్వామ్యాన్ని కాపాడండి.. అరాచకాన్ని తొలగించండి నినాదంతో బీజేపీ చేపట్టిన దేశవ్యాప్త ప్రచార కార్యక్రమంలో భాగంగా ఈ పాదయాత్ర నిర్వహించారు.ఈ కార్యక్రమం ద్వారా ఎన్నికల ప్రక్రియ, ఓటర్ల జాబితాల ప్రాముఖ్యతపై ప్రజల్లో అవగాహన కల్పించాలని బీజేపీ లక్ష్యంగా పెట్టుకుంది. ముఖ్యంగా ఓటర్ల జాబితాల ప్రత్యేక సమగ్ర సవరణ (SIR), ఎన్నికల ప్రక్రియపై ప్రతిపక్షాలు చేస్తున్న ఆరోపణలకు సమాధానం ఇవ్వడమే ఈ ప్రచారం ప్రధాన ఉద్దేశమని పార్టీ వర్గాలు పేర్కొంటున్నాయి.
బీజేపీ జాతీయ అధ్యక్షుడు నితిన్ నబీన్ ఆదేశాల మేరకు దేశవ్యాప్తంగా ఈ ప్రచార కార్యక్రమాన్ని చేపట్టారు. ఇందులో భాగంగా వివిధ జిల్లాల్లో పాదయాత్రలు, బహిరంగ సభలు, ప్రజలతో సమావేశాలు, మీడియా సమావేశాలు నిర్వహిస్తున్నారు.
ప్రతి జిల్లా కేంద్రంలో నిర్వహించే పాదయాత్రల్లో సుమారు 10 వేల మందిని భాగస్వాములను చేయాలని పార్టీ లక్ష్యంగా పెట్టుకుంది. అలాగే ప్రతి అసెంబ్లీ నియోజకవర్గంలో ప్రముఖులు, ఆహ్వానిత పౌరులతో సమావేశాలు నిర్వహించి ఎన్నికల జాబితాల సవరణపై చర్చించనున్నారు.
యువత, విద్యార్థులను కూడా ఈ కార్యక్రమంలో భాగస్వాములను చేయాలని బీజేపీ నిర్ణయించింది. విశ్వవిద్యాలయాలు, కళాశాలలు, ఐటీఐలు, కోచింగ్ కేంద్రాల్లో ప్రత్యేక కార్యక్రమాలు నిర్వహించనున్నారు. దేశవ్యాప్తంగా 10 లక్షల మందికి పైగా యువత, నిపుణులను చేరుకోవాలని లక్ష్యంగా పెట్టుకున్నారు.
Also Read:‘ఇట్లు అర్జున’ కోసం ఎన్టీఆర్..!
ఈ ప్రచార కార్యక్రమాన్ని రెండు విడతల్లో నిర్వహిస్తున్నారు. తొలి విడత అక్టోబర్ 22 నుంచి నవంబర్ 5 వరకు కొనసాగగా, రెండో విడత నవంబర్ 11 నుంచి 30 వరకు జరగనుంది. ప్రజాస్వామ్య వ్యవస్థలు, రాజ్యాంగ విలువలు, ఎన్నికల ప్రక్రియపై ప్రజల్లో అవగాహన పెంచడమే ఈ కార్యక్రమం లక్ష్యమని బీజేపీ వెల్లడించింది.