మలక్కా జలసంధిపై కన్నేసిన అమెరికా!

ప్రపంచ రాజకీయాలను మరియు ఆర్థిక వ్యవస్థను శాసించగల అత్యంత వ్యూహాత్మక కూడలి ‘మలక్కా జలసంధి’ (Strait of Malacca) పై అమెరికా తన పట్టును బిగిస్తోంది. తాజాగా ఇండోనేషియాతో కుదుర్చుకున్న ఒక కీలక ఒప్పందం అంతర్జాతీయ స్థాయిలో చర్చనీయాంశంగా మారింది.

ఈ ఒప్పందంలో భాగంగా, ఇండోనేషియా గగనతలంలో అమెరికా యుద్ధ విమానాలు నిరంతరం నిఘా ఉంచడానికి అనుమతి లభించింది. మలక్కా జలసంధి మీదుగా సాగే ప్రతీ కదలికను అమెరికా ఇప్పుడు తన అధునాతన యుద్ధ విమానాల ద్వారా పర్యవేక్షించనుంది. ఇది ఆ ప్రాంతంలో అమెరికా సైనిక ప్రాబల్యాన్ని మరింత పెంచడమే కాకుండా, ప్రత్యర్థి దేశాలకు గట్టి హెచ్చరికగా మారింది.

ఈ పరిణామం చైనాకు అత్యంత ఆందోళన కలిగించే విషయం. చైనాకు అవసరమైన ముడి చమురులో దాదాపు 80 శాతం ఈ మలక్కా జలసంధి ద్వారానే రవాణా అవుతుంది. ప్రపంచ సరుకు రవాణాలో 40 శాతం వాటా ఈ సముద్ర మార్గం ద్వారానే జరుగుతుంది. ఒకవేళ ఉద్రిక్త పరిస్థితుల్లో అమెరికా ఈ మార్గాన్ని గనుక దిగ్బంధిస్తే (Blockade), చైనా ఆర్థిక వ్యవస్థ కుప్పకూలే ప్రమాదం ఉంది. అందుకే దీనిని చైనా ‘మలక్కా డైలెమ్మా’ (Malacca Dilemma) అని పిలుస్తుంటుంది.

Also Read:ఎంతసేపు స్క్రీన్ చూస్తే ప్రమాదమో తెలుసా?

ఇండోనేషియాతో అమెరికా చేతులు కలపడం ద్వారా, ఇండో-పసిఫిక్ ప్రాంతంలో చైనా ప్రాబల్యాన్ని అడ్డుకోవడానికి అగ్రరాజ్యం సిద్ధమైందని స్పష్టమవుతోంది. మలక్కా జలసంధిపై పట్టు సాధించడం అంటే, ప్రపంచ వాణిజ్యం మరియు ఇంధన సరఫరాపై అదుపు సాధించడమే.