అన్నాడీఎంకేకు వరుస షాక్ల మీద షాక్లు తగులుతున్నాయి. పార్టీకి పరాజయాల పరంపర, అంతర్గత సంక్షోభం తర్వాత మరో గట్టి ఎదురుదెబ్బ తగిలింది. కరూర్ శాసనసభ నియోజకవర్గ ఎమ్మెల్యే, మాజీ మంత్రి ఎంఆర్ విజయభాస్కర్ సోమవారం తన శాసనసభ సభ్యత్వానికి రాజీనామా చేశారు. అసెంబ్లీ సభ్యత్వంతో పాటు ఆయన ఏఐఏడీఎంకే ప్రాథమిక సభ్యత్వానికి కూడా రాజీనామా చేస్తున్నట్లు ప్రకటించారు.
2026 తమిళనాడు అసెంబ్లీ ఎన్నికల ఫలితాలు ముగిసిన తర్వాత ఏఐఏడీఎంకే పార్టీని వీడిన ఆరో ఎమ్మెల్యేగా విజయభాస్కర్ నిలిచారు. ఎన్నికల తర్వాత వరుసగా కీలక నేతలు పార్టీని వీడుతుండటంతో అన్నాడీఎంకే శ్రేణులు తీవ్ర నిరాశలో మునిగిపోయాయి. ముఖ్యంగా పశ్చిమ తమిళనాడు (కొంగు బెల్ట్) ప్రాంతంలో పార్టీకి బలమైన పట్టున్న కరూర్ జిల్లాలో విజయభాస్కర్ రాజీనామా చేయడం పార్టీకి కోలుకోలేని దెబ్బగా రాజకీయ విశ్లేషకులు భావిస్తున్నారు.
వరుసగా జరుగుతున్న ఈ రాజీనామాలు, నిష్క్రమణలు ఏఐఏడీఎంకే అధినేత ఎడప్పాడి కే పళనిస్వామి (EPS) నాయకత్వానికి పెద్ద సవాలుగా మారాయి. ఎన్నికల ఓటమి తర్వాత పార్టీని తిరిగి గాడిన పెట్టేందుకు ఆయన ప్రయత్నిస్తున్నప్పటికీ, సిట్టింగ్ ఎమ్మెల్యేలు ఒకరి తర్వాత ఒకరు పార్టీని వీడుతుండటం అన్నాడీఎంకేను మరింత రక్షణలో పడేసింది. ఈ తాజా పరిణామం తమిళనాడు రాజకీయాల్లో తీవ్ర చర్చనీయాంశంగా మారింది.
Also Read:GIC:తెలంగాణ క్రికెట్లో కొత్త అధ్యాయం