భారత్‌, న్యూజిలాండ్‌ మధ్య జరిగిన మూడో టీ20 మ్యాచ్‌లో యువ బ్యాటర్ వైభవ్ సూర్యవంశీ తన బ్యాటింగ్‌తో ఆకట్టుకున్నాడు. ఓపెనర్‌గా బరిలోకి దిగిన ఈ 15 ఏళ్ల కుర్రాడు కేవలం 19 బంతుల్లోనే 45 పరుగులు చేసి భారత జట్టు భారీ విజయానికి బాటలు వేశాడు. ఈ నేపథ్యంలో మాజీ భారత క్రికెటర్ సదగోపన్ రమేశ్.. వైభవ్‌కు టీమ్ మేనేజ్‌మెంట్ చాక్లెట్ ఇచ్చిందంటూ ఆసక్తికర వ్యాఖ్యలు చేశాడు.
న్యూజిలాండ్‌తో రెండో టీ20లో ఇషాన్ కిషన్ గాయపడటంతో వైభవ్ జట్టులోకి వచ్చాడు. అయితే అప్పటికే ఓపెనర్లుగా రాణిస్తున్న అభిషేక్ శర్మ, సంజూ శాంసన్‌లను మార్చకుండా అతడిని మూడో స్థానంలో బ్యాటింగ్‌కు పంపించారు. ఆ మ్యాచ్‌లో వైభవ్ ఎనిమిది బంతులు ఎదుర్కొని నాలుగు పరుగులకే ఔటయ్యాడు. అంతర్జాతీయ క్రికెట్‌లో మూడో స్థానంలో బ్యాటింగ్ చేయడం అతడికి కొత్త కావడంతో ఒత్తిడికి గురయ్యాడని రమేశ్ అభిప్రాయపడ్డాడు.
మూడో టీ20లో మాత్రం వైభవ్‌ను మళ్లీ ఓపెనర్‌గా పంపించారు. దీంతో అతడు తన సహజమైన దూకుడుతో బ్యాటింగ్ చేశాడని రమేశ్ పేర్కొన్నాడు. యువ ఆటగాడిని తనకు అనుకూలమైన స్థానంలో ఆడించడం ద్వారా టీమ్ మేనేజ్‌మెంట్ అతడికి స్వేచ్ఛగా ఆడే అవకాశం ఇచ్చిందని వివరించాడు. చిన్నపిల్లలకు ఇష్టమైన చాక్లెట్ ఇచ్చినట్లుగా వైభవ్‌కు ఓపెనింగ్ అవకాశం ఇచ్చారని సరదాగా వ్యాఖ్యానించాడు.
Also Read:ఆంధ్రప్రదేశ్‌పై అర్నబ్‌ పంజా..
ఓపెనర్‌గా వచ్చినప్పుడు వికెట్లు పడకముందే బ్యాటింగ్ చేసే అవకాశం ఉంటుందని, పవర్‌ప్లేలో బయట ఫీల్డర్లపై పరిమితులు ఉండటంతో వైభవ్ వంటి దూకుడుగా ఆడే బ్యాటర్లకు అది ప్రయోజనకరమని రమేశ్ చెప్పాడు. మూడో స్థానంలో బ్యాటింగ్‌కు వచ్చినప్పుడు అప్పటి మ్యాచ్ పరిస్థితులకు అనుగుణంగా ఆడాల్సి ఉంటుందని, ఆ ఒత్తిడి యువ ఆటగాడి సహజమైన ఆటను ప్రభావితం చేయవచ్చని వివరించాడు.