హైదరాబాద్ నగరంలో తాగునీటి సరఫరా సమస్యను ప్రభుత్వం వెంటనే పరిష్కరించాలని బీఆర్ఎస్ ఎమ్మెల్యేలు డిమాండ్ చేశారు. సమస్యను పరిష్కరించకపోతే హైదరాబాద్ ప్రజలతో కలిసి ముఖ్యమంత్రి రేవంత్ రెడ్డి నివాసం ముందు నిరసనకు దిగుతామని హెచ్చరించారు. ప్రభుత్వ నిర్లక్ష్యం వల్ల నగర ప్రజలు ఇబ్బందులు పడుతున్నారని ఎల్బీ నగర్ ఎమ్మెల్యే సుధీర్ రెడ్డి ఆరోపించారు. నీటి సమస్యపై గతంలోనే వాటర్ వర్క్స్ ఎండీకి ఫిర్యాదు చేసినప్పటికీ ఇప్పటివరకు పరిష్కారం లభించలేదని తెలిపారు.
జూన్ నెల నుంచే హైదరాబాద్‌లో తక్కువ నీరు సరఫరా అవుతోందని సుధీర్ రెడ్డి పేర్కొన్నారు. ఈ సమస్యను వాటర్ వర్క్స్ ఎండీ దృష్టికి తీసుకెళ్లి ఫిర్యాదు చేశామని, కొద్ది రోజుల్లో సరిచేస్తామని హామీ ఇచ్చినా అధికారులు పట్టించుకోలేదని విమర్శించారు. కన్నెపల్లి పంప్‌హౌస్ వద్ద మోటార్లు ఆన్ చేసి నీటిని పంపింగ్ చేస్తే హైదరాబాద్‌కు తాగునీటి సరఫరా మెరుగుపడేదని అన్నారు.
కన్నెపల్లి పంప్‌హౌస్‌లో 17 మోటార్లను ఆన్ చేసి సుమారు 2,600 క్యూసెక్కుల నీటిని పంపింగ్ చేసే అవకాశం ఉన్నప్పటికీ ఆ సామర్థ్యాన్ని వినియోగించుకోలేదని ఆరోపించారు. అక్కడి నుంచి నీటిని ఎత్తిపోసి ఉంటే హైదరాబాద్‌లో తాగునీటి సమస్యతో పాటు శ్రీరాంసాగర్, నిజాంసాగర్ ఆయకట్టు పరిధిలోని సుమారు 20 లక్షల ఎకరాలకు సాగునీటి ఇబ్బందులు కూడా తప్పేవని అభిప్రాయపడ్డారు.
మేడిగడ్డ బ్యారేజీ వద్ద బాంబు పేలుడు శబ్దం వినిపించిందని ఓ అధికారి ఫిర్యాదు చేసినప్పటికీ ఇప్పటివరకు విచారణ జరపలేదని సుధీర్ రెడ్డి ఆరోపించారు. బ్యారేజీ పిల్లర్లు దెబ్బతినేలా కుట్రపూరితంగా బాంబు పెట్టి ఉండవచ్చనే అనుమానాలను వ్యక్తం చేశారు. ఈ వ్యవహారంపై సమగ్ర విచారణ జరిపి వాస్తవాలను బయటపెట్టాలని డిమాండ్ చేశారు.నగరంలో తాగునీటి సరఫరా సమస్యపై ప్రభుత్వం తక్షణ చర్యలు తీసుకోవాలని బీఆర్ఎస్ ఎమ్మెల్యేలు డిమాండ్ చేశారు. ప్రజలకు ఇబ్బందులు కలగకుండా నీటి సరఫరాను మెరుగుపరచాలని, కన్నెపల్లి పంప్‌హౌస్ వినియోగంపై స్పష్టత ఇవ్వాలని కోరారు.
Also Read:రీమేక్‌కు నో.. సొంత కథతో వచ్చా!