జ్ఞానేశ్ రాజీనామాపై మార్కో రూబియో!

భారత ప్రధాన ఎన్నికల కమిషనర్ (సీఈసీ) జ్ఞానేశ్ కుమార్ రాజీనామా చేయాలంటూ జరుగుతున్న నిరసనలపై అమెరికా విదేశాంగ మంత్రి మార్కో రూబియో స్పందించారు. ఇవి భారత్‌ అంతర్గత రాజకీయ వ్యవహారాలని, వాటిపై తాము అభిప్రాయం వెల్లడించబోమని స్పష్టం చేశారు. ప్రజాస్వామ్య దేశమైన భారత్‌లో ఎన్నికలు జరుగుతాయని, రాజకీయ భేదాభిప్రాయాలను ప్రజలే పరిష్కరించుకోవాలని పేర్కొన్నారు.

భారత్‌లో ప్రతిపక్ష పార్టీలు, విద్యార్థి సంఘాలు చేపడుతున్న నిరసనలు, వాటిపై ఐక్యరాజ్యసమితి నిపుణులు వ్యక్తం చేసిన ఆందోళనల గురించి విలేకరులు ప్రశ్నించగా రూబియో ఈ వ్యాఖ్యలు చేశారు. ఇది ప్రజాస్వామ్యం. ఇక్కడ ఎన్నికలు జరుగుతాయి. కాబట్టి ఆ దేశ అంతర్గత రాజకీయ వ్యవహారాలపై నేను అభిప్రాయం చెప్పదలచుకోలేదు అని పేర్కొన్నారు.

ప్రజలు తమ అభిప్రాయాలను వ్యక్తం చేయడం, రాజకీయ అంశాలపై భిన్నమైన అభిప్రాయాలు కలిగి ఉండటం ప్రజాస్వామ్యంలో సహజమని అన్నారు. అయితే, అల్లర్లు, ఆస్తుల ధ్వంసం, భవనాలకు నిప్పు పెట్టడం వంటి హింసాత్మక ఘటనలకు శాంతియుత నిరసనలకు మధ్య తేడా ఉందని వివరించారు. భారత్‌లో నిరసనలపై ఐక్యరాజ్యసమితి నిపుణులు చేసిన విమర్శల గురించి ప్రశ్నించగా రూబియో వ్యంగ్యంగా స్పందించారు. యూఎన్‌ నిపుణులా? అదొక విరుద్ధ పదజాలం కాదా? అంటూ వ్యాఖ్యానించారు. అయితే భారత్‌లో నిరసనలపై అమెరికా అధికారికంగా ఎలాంటి జోక్యం చేసుకోబోదని స్పష్టం చేశారు.

Also Read:ఎమ్మెల్యే వివేకా బర్త్ డే..గ్రీన్ ఛాలెంజ్

క్యూబాను ఉదాహరణగా ప్రస్తావించిన రూబియో.. అక్కడ ప్రతిపక్ష గొంతుకలకు స్వేచ్ఛగా పనిచేసే అవకాశం లేదని, జైలు, అణచివేత లేదా దేశ బహిష్కరణ వంటి పరిణామాలను ఎదుర్కోవాల్సి రావచ్చని పేర్కొన్నారు. ప్రజలు తమ అభిప్రాయాలను వ్యక్తం చేయగలగడం ప్రజాస్వామ్యానికి ముఖ్యమైన లక్షణమని అన్నారు.