సూపర్‌స్టార్‌ రజనీకాంత్‌ అభిమానుల సందడి మరోసారి అంబరాన్నంటింది. ఆయన నటించిన తాజా చిత్రం ‘జైలర్ 2’ థియేటర్లలో విడుదల కావడంతో అభిమానులు పండగ చేసుకుంటున్నారు. తమిళనాడులోని చెన్నైతో పాటు దేశంలోని పలు ప్రాంతాల్లో సినిమా థియేటర్ల వద్ద భారీగా చేరిన అభిమానులు డ్యాన్సులు చేస్తూ, బాణసంచా కాలుస్తూ సందడి చేశారు. రజనీకాంత్‌ పోస్టర్లకు పాలాభిషేకాలు చేసి, హారతులు ఇచ్చి తమ అభిమానాన్ని చాటుకున్నారు. ఈ వేడుకలకు సంబంధించిన వీడియోలు ప్రస్తుతం సోషల్‌ మీడియాలో వైరల్‌గా మారాయి.
చెన్నైలోని కోయంబేడు ప్రాంతంలో ఉన్న రోహిణి థియేటర్‌ వద్ద అభిమానుల సందడి ప్రత్యేక ఆకర్షణగా నిలిచింది. తెల్లవారుజామునే థియేటర్లకు చేరుకున్న అభిమానులు డప్పుల మోతకు అనుగుణంగా నృత్యాలు చేశారు. రజనీకాంత్‌ భారీ కటౌట్లు, పోస్టర్లకు పాలాభిషేకాలు చేస్తూ తమ అభిమానాన్ని ప్రదర్శించారు. కొన్ని ప్రాంతాల్లో కొబ్బరికాయలు కొట్టి, టపాసులు కాల్చి సినిమా విడుదలను వేడుకగా జరుపుకున్నారు.
రజనీకాంత్‌ సినిమాలపై అభిమానులకు ఉన్న క్రేజ్‌ భారతదేశానికే పరిమితం కాలేదు. అమెరికా సహా విదేశాల్లోనూ ‘జైలర్ 2’ విడుదల సందర్భంగా అభిమానులు వేడుకలు నిర్వహించారు. బెంగళూరు, మైసూరు వంటి నగరాల్లోనూ తెల్లవారుజామున ప్రత్యేక ప్రదర్శనలకు ప్రేక్షకులు పెద్ద సంఖ్యలో హాజరయ్యారు. జపాన్‌లోనూ రజనీకాంత్‌ అభిమానులు సినిమా విడుదలను స్వాగతిస్తూ సోషల్‌ మీడియాలో పోస్టులు పెట్టారు.
Also Read:MGR బయోపిక్‌లో త్రిష?
దశాబ్దాలుగా ప్రేక్షకులను అలరిస్తున్న రజనీకాంత్‌ మరోసారి తన స్టార్‌డమ్‌ను చాటుకున్నారు. ఆయన తెరపై కనిపించగానే అభిమానుల కేరింతలు, ఈలలతో థియేటర్లు మార్మోగినట్లు వీడియోలు వెల్లడిస్తున్నాయి.
2023లో విడుదలైన ‘జైలర్’కు కొనసాగింపుగా ‘జైలర్ 2’ తెరకెక్కింది. నెల్సన్‌ దిలీప్‌కుమార్‌ దర్శకత్వం వహించిన ఈ చిత్రంలో రజనీకాంత్‌ మరోసారి ముత్తువేల్‌ పాండియన్‌ పాత్రలో కనిపిస్తున్నారు. మోహన్‌లాల్‌, శివరాజ్‌కుమార్‌, జాకీ ష్రాఫ్‌, ఎస్‌.జే. సూర్య, విద్యా బాలన్‌ తదితరులు ఈ చిత్రంలో కీలక పాత్రలు పోషించారు. అనిరుధ్‌ రవిచందర్‌ సంగీతం అందించారు.