విశాఖపట్నంలోని హిందూస్థాన్ షిప్‌యార్డ్‌లో కీలకమైన కొత్త సదుపాయం అందుబాటులోకి వచ్చింది. నౌకల నిర్మాణ సామర్థ్యాన్ని మరింత పెంచే లక్ష్యంతో ఏర్పాటు చేసిన కొత్త స్లిప్‌వేను కేంద్ర రక్షణ మంత్రి రాజ్‌నాథ్ సింగ్ ప్రారంభించారు.
అత్యంత భారీ పరిమాణంలో ఉండే నౌకలను నిర్మించేందుకు వీలుగా ఈ స్లిప్‌వేను ఆధునిక సదుపాయాలతో రూపొందించారు. దీని ద్వారా హిందూస్థాన్ షిప్‌యార్డ్‌లో పెద్ద నౌకల నిర్మాణ సామర్థ్యం గణనీయంగా పెరగనుంది. రక్షణ రంగంలో దేశీయ నౌకా నిర్మాణాన్ని బలోపేతం చేయడంలో ఈ కొత్త సదుపాయం కీలకంగా మారనుంది.
ఈ సందర్భంగా ఐదో ఫ్లీట్ సపోర్ట్ షిప్ నిర్మాణానికి రాజ్‌నాథ్ సింగ్ కీల్ లేయింగ్ కార్యక్రమాన్ని నిర్వహించారు. దీంతో నౌక నిర్మాణ ప్రక్రియ అధికారికంగా ప్రారంభమైంది.
దేశ రక్షణ అవసరాలకు అనుగుణంగా ఆధునిక యుద్ధ నౌకలు, సహాయక నౌకల నిర్మాణ సామర్థ్యాన్ని పెంచుకోవడంలో హిందూస్థాన్ షిప్‌యార్డ్ కీలక పాత్ర పోషిస్తోంది. కొత్త స్లిప్‌వే అందుబాటులోకి రావడంతో భవిష్యత్‌లో భారీ నౌకల నిర్మాణానికి మరింత అనుకూల వాతావరణం ఏర్పడనుంది.
Also Read:‘కాకా’లో బాలీవుడ్ నటుడు!
స్వదేశీ రక్షణ ఉత్పత్తులను ప్రోత్సహించడం, నౌకా నిర్మాణ రంగంలో భారత్ సామర్థ్యాన్ని పెంచడం లక్ష్యంగా కేంద్ర ప్రభుత్వం చేపడుతున్న చర్యల్లో భాగంగా ఈ సదుపాయం ప్రాధాన్యం సంతరించుకుంది. నౌకా నిర్మాణ రంగంలో మౌలిక వసతులను మరింత అభివృద్ధి చేయడం ద్వారా దేశ రక్షణ సామర్థ్యాన్ని బలోపేతం చేయాలని ప్రభుత్వం భావిస్తోంది.