చిదంబరంకు శివరాజ్‌ కౌంటర్

‘వన్ నేషన్, వన్ ఎలక్షన్’ (ఒకే దేశం, ఒకే ఎన్నికలు) ప్రతిపాదనను వ్యతిరేకిస్తున్న కాంగ్రెస్ ఎంపీ పి. చిదంబరం వ్యాఖ్యలపై కేంద్ర మంత్రి శివరాజ్ సింగ్ చౌహాన్ తీవ్రంగా మండిపడ్డారు. నాటి కాంగ్రెస్ ప్రభుత్వం రాజ్యాంగ విరుద్ధంగా వ్యవస్థను నాశనం చేయడానికి ముందే దేశంలో లోక్‌సభ, విధానసభలకు ఒకేసారి ఎన్నికలు జరిగాయని ఆయన గుర్తుచేశారు.

అంతకుముందు పార్లమెంట్‌లో ‘వన్ నేషన్, వన్ ఎలక్షన్’ బిల్లు ఆమోదం పొందినా, 2029లో జమిలి ఎన్నికలు జరపడం సాధ్యం కాదని సీనియర్ కాంగ్రెస్ నేత పి. చిదంబరం వ్యాఖ్యానించారు. దీనికి సంబంధించి ఉమ్మడి పార్లమెంటరీ కమిటీ (JPC) ముందు కూడా హాజరై, ఈ బిల్లు రాజ్యాంగ ప్రాథమిక సూత్రాలను ఉల్లంఘిస్తోందని పేర్కొంటూ సోషల్ మీడియా (X) వేదికగా పోస్ట్ చేశారు.

చిదంబరం వ్యాఖ్యలను తిప్పికొడుతూ శివరాజ్ చౌహాన్ మాట్లాడుతూ.. 1970ల కాలంలో ఎన్నికైన ప్రతిపక్ష ప్రభుత్వాలను కాంగ్రెస్ పార్టీ రాజ్యాంగ విరుద్ధంగా కూల్చివేసిందని ఆరోపించారు. వన్ నేషన్ వన్ ఎలక్షన్ రాజ్యాంగ విరుద్ధమని, కాంగ్రెస్ పార్టీ అంతరాత్మ దీనికి అంగీకరించదని చిదంబరం చెప్తున్నారు. అసలు ఆయన ఏ అంతరాత్మ గురించి మాట్లాడుతున్నారు? 1952, 1957, 1962 మరియు 1967 లలో లోక్‌సభకు, రాష్ట్రాల అసెంబ్లీలకు ఒకేసారి ఎన్నికలు జరిగాయి. కానీ ఆ తర్వాత కాంగ్రెస్ పార్టీ కుట్రలు పన్ని, ప్రతిపక్ష ప్రభుత్వాలను కూల్చివేసి ఆ వ్యవస్థను నాశనం చేసింది అని శివరాజ్ చౌహాన్ ఆగ్రహం వ్యక్తం చేశారు.

లా కమిషన్ మాత్రమే కాకుండా పూర్వ రాష్ట్రపతి రామ్‌నాథ్ కోవింద్ నేతృత్వంలోని ఉన్నత స్థాయి కమిటీ కూడా జమిలి ఎన్నికలు నిర్వహించాలని పలుమార్లు సిఫార్సు చేసిందని ఆయన చెప్పారు. దేశంలో తరచూ ఎన్నికలు జరగడం వల్ల ప్రజాప్రతినిధులు అభివృద్ధి పనులపై దృష్టి సారించలేకపోతున్నారని చౌహాన్ పేర్కొన్నారు. “తరచూ వచ్చే ఎన్నికల వల్ల ప్రభుత్వం మరియు రాజకీయ పార్టీలపై ఆర్థిక భారం పెరగడమే కాకుండా అభివృద్ధి పనులకు తీవ్ర ఆటంకం కలుగుతోంది. ప్రధాని, ముఖ్యమంత్రులు, మంత్రులు, ఎంపీలు, ఎమ్మెల్యేలు మరియు పార్టీ శ్రేణులు తమ అమూల్యమైన సమయాన్ని ఎన్నికలకే కేటాయించాల్సి వస్తోంది. అలాగే ఉపాధ్యాయులు, రెవెన్యూ, పోలీసు, పరిపాలనా సిబ్బంది ప్రజా సేవను పక్కనపెట్టి ఎన్నికల ఏర్పాట్లలోనే నిమగ్నమవుతున్నారు” అని వివరించారు.

ALso Read:తృణమూల్ రెబెల్ ఎంపీలకు నోటీసులు

కాంగ్రెస్ పార్టీ వైఖరి ఏమైనప్పటికీ, జాతీయ ప్రయోజనాలే అత్యంత ముఖ్యమని, దేశాభివృద్ధికి ‘వన్ నేషన్, వన్ ఎలక్షన్’ చాలా అవసరమని ఆయన స్పష్టం చేశారు. దేశ ప్రజల్లో కూడా జమిలి ఎన్నికలపై విస్తృతమైన మద్దతు ఉందని శివరాజ్ సింగ్ చౌహాన్ వెల్లడించారు.