TVKలో చేరిన నటుడు దేవన్!

ఇటీవలే భారతీయ జనతా పార్టీ (BJP)కి రాజీనామా చేసిన ప్రముఖ సినీ నటుడు ఎస్. దేవన్….తమిళనాడు ముఖ్యమంత్రి సి. జోసెఫ్ విజయ్ నాయకత్వంలోని తమిళగ వెట్రి కజగం (TVK) పార్టీలో చేరాలని నిర్ణయించుకున్నట్లు సోమవారం వెల్లడించారు. భాజపా కేరళ రాష్ట్ర ఉపాధ్యక్షుడిగా ఉన్న దేవన్ ఇటీవల ఒక బహిరంగ సభలో ఆ పదవికి మరియు పార్టీ ప్రాథమిక సభ్యత్వానికి రాజీనామా చేస్తున్నట్లు ప్రకటించిన సంగతి తెలిసిందే.

రెండు రోజుల క్రితం తమిళగ వెట్రి కజగం (TVK) ప్రతినిధులు తనను కలిసి పార్టీలోకి ఆహ్వానించారని దేవన్ విలేకరులకు తెలిపారు. అనంతరం జరిగిన వీడియో కాన్ఫరెన్స్ సమావేశం తర్వాత ఆ ఆహ్వానాన్ని స్వీకరించినట్లు చెప్పారు. సెప్టెంబర్ 10న తమిళనాడులో టీవీకే అగ్రనేతలతో సమావేశం జరగనుందని, ఆ తర్వాత అధికారికంగా పార్టీ చేరికపై ప్రకటన ఉంటుందని స్పష్టం చేశారు.

తనకు టీవీకే కేరళ రాష్ట్ర అధ్యక్ష పదవిని ప్రతిపాదించారని రాబోయే సమావేశాల్లో ఈ విషయమై చర్చించనున్నట్లు వెల్లడించారు. విద్యార్థి దశలో కాంగ్రెస్‌తో పాటు దాని విద్యార్థి విభాగమైన కేరళ స్టూడెంట్స్ యూనియన్ (KSU)లో చురుగ్గా పనిచేశారు. నాయకుల వైఫల్యాల వల్ల 2004లో సొంతంగా పార్టీ పెట్టారు.

మొదట ‘కేరళ పీపుల్స్ పార్టీ’ని స్థాపించి, 2020లో దానిని ‘నవ కేరళ పీపుల్స్ పార్టీ’గా మార్చారు. 2021లో కేంద్ర హోంశాఖ మంత్రి అమిత్ షాతో సమావేశమైన తర్వాత తన పార్టీని భాజపాలో విలీనం చేశారు. అనంతరం ఆయనకు భాజపా రాష్ట్ర ఉపాధ్యక్ష పదవి దక్కింది. భాజపాలో తగినంత స్వేచ్ఛ మరియు ప్రాధాన్యత లభించకపోవడం వల్లే తాను పార్టీని వీడానని, కేరళలో ప్రస్తుత రాజకీయ వ్యవస్థను మార్చడంలో భాజపా పూర్తిగా విఫలమైందని దేవన్ విమర్శించారు.

Also Read:TAUK:ఇండియా డే వేడుకల్లో తెలంగాణం