వర్షాకాలం ఎండ తీవ్రత నుంచి ఉపశమనం అందించినప్పటికీ, మన రోజువారీ వ్యాయామ ప్రణాళికలను దెబ్బతీస్తుంది. వరుసగా కురిసే వర్షాలు, జారే రోడ్లు, పెరిగే తేమ శాతం మరియు సీజనల్ ఇన్ఫెక్షన్ల ప్రమాదం వల్ల నిరంతరం యాక్టివ్గా ఉండటం కష్టమవుతుంది. అయితే కొన్ని చిన్నపాటి మార్పులతో ఈ సీజన్లో కూడా ఆరోగ్యాన్ని, ఫిట్నెస్ను కాపాడుకోవచ్చు.
వర్షాల వల్ల జోగింగ్ లేదా సైక్లింగ్ వంటి అవుట్డోర్ (బయట) కార్యకలాపాలకు వీలుండకపోవచ్చు. అలాంటి రోజుల్లో యోగా, స్ట్రెంగ్త్ ట్రైనింగ్, పిలేట్స్ , స్కిప్పింగ్ లేదా ఇంట్లోనే చేసే వర్కౌట్లను ఎంచుకోవచ్చు. ఇవి రోడ్డుపై జారిపడే ప్రమాదం లేకుండా వర్షంలో తడవకుండా మిమ్మల్ని ఫిట్గా ఉంచడంలో సహాయపడతాయి.
వర్షాకాలంలో మొత్తం ఆరోగ్యాన్ని కాపాడుకోవడంలో సమతుల్య ఆహారం కీలక పాత్ర పోషిస్తుంది. సీజనల్ పండ్లు, కూరగాయలు, తృణధాన్యాలు, ప్రోటీన్లు మరియు విటమిన్ సీ (C), విటమిన్ డి (D) సమృద్ధిగా ఉండే ఆహారాన్ని తీసుకోవాలి. దాహం తక్కువగా అనిపించినప్పటికీ తగినంత నీరు తాగాలి. వేయించిన పదార్థాలు మరియు వీధి ఆహారాన్ని పరిమితం చేయాలి.
వాతావరణంలో తేమ వల్ల అసౌకర్యం మరియు చర్మ ఇన్ఫెక్షన్లు వచ్చే అవకాశం ఉంటుంది. కాబట్టి తేలికపాటి, చెమటను త్వరగా పీల్చుకునే వ్యాయామ దుస్తులను మరియు జారిపోని బూట్లను ధరించాలి. ఫంగస్ పెరగకుండా ఉండటానికి వ్యాయామం పూర్తికాగానే బూట్లు, దుస్తులను బాగా ఆరబెట్టాలి.వర్షాకాలంలో తీవ్రమైన వ్యాయామాల కంటే, క్రమం తప్పకుండా చేయడం చాలా ముఖ్యం. వారంలో ఎక్కువ రోజులు కనీసం 30 నిమిషాల పాటు సాధారణ వ్యాయామాలు ఉండేలా చూసుకోండి. ఒకవేళ బయట వ్యాయామం చేస్తుంటే నీరు నిలిచిన ప్రాంతాలు, జారే ప్రదేశాలు మరియు ఉరుములు, మెరుపులు ఉన్న సమయంలో బయటకు వెళ్లకపోవడం మంచిది.
Also Read:పేరుకే 5 స్టార్ హోటళ్లు..లోపల అంతా!
తేమతో కూడిన వాతావరణం అలసటను, ఇన్ఫెక్షన్ల ప్రమాదాన్ని పెంచుతుంది. తగినంత నిద్రపోవడం, వర్కౌట్కు ముందు మరియు తర్వాత స్ట్రెచింగ్ చేయడం, వ్యక్తిగత పరిశుభ్రతను పాటించడం అవసరం. వ్యాయామం పూర్తయిన వెంటనే స్నానం చేయడం, వర్కౌట్ గేర్ను శుభ్రంగా ఉంచుకోవడం మరియు చేతులను క్రమం తప్పకుండా కడుక్కోవడం ద్వారా క్రిములు వ్యాపించకుండా జాగ్రత్త పడవచ్చు.