తెలంగాణలో నిరుద్యోగ యువత, విద్యార్థి లోకం మరోసారి ఉద్యమబాట పట్టారు. అసెంబ్లీ ఎన్నికల సమయంలో కాంగ్రెస్ ప్రభుత్వం ఇచ్చిన 2 లక్షల ఉద్యోగాల హామీని వెంటనే నెరవేర్చాలని డిమాండ్ చేస్తూ ఉస్మానియా యూనివర్సిటీ (OU) వేదికగా విద్యార్థి సంఘాలు కదం తొక్కాయి. బీఆర్ఎస్ విద్యార్థి విభాగం (BRSV) మరియు ఇతర విద్యార్థి సంఘాల ఆధ్వర్యంలో బుధవారం ఓయూ క్యాంపస్లో భారీ నిరసన ర్యాలీ నిర్వహించారు.
ఉస్మానియా యూనివర్సిటీ మెయిన్ లైబ్రరీ నుంచి ప్రారంభమైన ఈ ర్యాలీ ఆర్ట్స్ కాలేజీ వరకు కొనసాగింది. పెద్ద సంఖ్యలో తరలివచ్చిన నిరుద్యోగ యువత, విద్యార్థులు కాంగ్రెస్ ప్రభుత్వానికి వ్యతిరేకంగా, తమ డిమాండ్లకు మద్దతుగా పెద్ద పెట్టున నినాదాలు చేశారు. ఈ నిరసనతో ఓయూ క్యాంపస్ అంతా ఒక్కసారిగా హోరెత్తింది.
()2 లక్షల ఉద్యోగాల భర్తీ: ఎన్నికల మేనిఫెస్టోలో ప్రకటించిన విధంగా 2 లక్షల ఉద్యోగాల హామీని ప్రభుత్వం తక్షణమే అమలు చేయాలి.
()పోలీస్ కొలువుల నోటిఫికేషన్: నిరుద్యోగులు ఎంతో ఆశగా ఎదురుచూస్తున్న 20 వేల పోలీస్ ఉద్యోగాల భర్తీకి తక్షణమే నోటిఫికేషన్ విడుదల చేయాలి.
()ఓయూ నిధుల విడుదల: ఉస్మానియా యూనివర్సిటీ అభివృద్ధి కోసం గతంలో ప్రకటించిన రూ.1,000 కోట్ల నిధులను సర్కార్ వెంటనే విడుదల చేసి, వర్సిటీ మౌలిక వసతులను మెరుగుపరచాలి.
Also Read:వీడియో..రిల్స్ కోసం ప్రాణాలతో చెలగాటం
ఈ సందర్భంగా విద్యార్థి సంఘాల నాయకులు మాట్లాడుతూ.. అధికారంలోకి వచ్చి ఇన్ని రోజులవుతున్నా నిరుద్యోగుల జీవితాల్లో ఎలాంటి మార్పు రాలేదని మండిపడ్డారు. ఇప్పటికైనా కాంగ్రెస్ ప్రభుత్వం కాలయాపన చేయకుండా తక్షణమే జాబ్ క్యాలెండర్, ఉద్యోగ నోటిఫికేషన్లు ఇవ్వాలని, లేనిపక్షంలో రాష్ట్రవ్యాప్తంగా ఉద్యమాన్ని తీవ్రతరం చేస్తామని హెచ్చరించారు.