SIR:ఎన్యుమరేషన్ ఫారమ్ అంటే ఏమిటి?

తెలంగాణలో ప్రత్యేక ఓటర్ల జాబితా సవరణ ప్రారంభమైంది. బూత్ స్థాయి అధికారులు (BLOs) ఓటర్ల వివరాల ధృవీకరణ కోసం ప్రస్తుత ఓటర్లకు ‘ఎన్యుమరేషన్ ఫారమ్‌లను’ పంపిణీ చేస్తున్నారు. తెలంగాణ ప్రధాన ఎన్నికల అధికారి (CEO) సి. సుదర్శన్ రెడ్డి తెలిపిన వివరాల ప్రకారం… ఓటర్ల రికార్డులను నవీకరించడం (అప్‌డేట్ చేయడం), వేరే ప్రాంతాలకు వలస వెళ్లిన లేదా మరణించిన ఓటర్లను గుర్తించడం మరియు అర్హులైన ఓటర్లందరూ ఓటర్ల జాబితాలో ఉండేలా చూడటమే ఈ ప్రక్రియ యొక్క ముఖ్య ఉద్దేశ్యం. ఓటర్లు ఈ ఫారమ్‌ను నింపి సమర్పించాల్సి ఉంటుంది. ఆ తర్వాత బీఎల్ఓలు ఈ సమాచారాన్ని పరిశీలించి ‘బీఎల్ఓ యాప్’ (BLO App) ద్వారా డేటాను అప్‌లోడ్ చేస్తారు.

ఎన్యుమరేషన్ ఫారమ్ అనేది ఓటరు వివరాల ధృవీకరణ కోసం ప్రత్యేక ముమ్మర సవరణ సమయంలో పంపిణీ చేయబడే ఒక ముందస్తు సమాచార పత్రం.

ప్రతి ఓటరుకు రెండు ఎన్యుమరేషన్ ఫారమ్ కాపీలను అందజేస్తారు.

ఒక కాపీని పూర్తిగా నింపి బీఎల్ఓకు సమర్పించాలి.

రెండవ కాపీని ఓటరు రసీదుగా (Acknowledgment) తన వద్దే ఉంచుకోవాలి.

ఈ ఫారమ్‌ను ఓటర్ సర్వీసెస్ పోర్టల్ ద్వారా ఆన్‌లైన్‌లో కూడా పూర్తి చేయవచ్చు.

ఎన్యుమరేషన్ ఫారమ్‌ను ఎలా నింపాలి?

బూత్ స్థాయి అధికారి (BLO) మీ ఇంటిని సందర్శించినప్పుడు..టర్లు ఈ క్రింది వివరాలను జాగ్రత్తగా తనిఖీ చేసి, పూర్తి చేయాలి:

ఎపిక్ నంబర్ (EPIC Number – ఓటరు గుర్తింపు కార్డు సంఖ్య).

ఓటరు ఐడీ కార్డుపై ఉన్న విధంగా ఓటరు పేరు.

తండ్రి / తల్లి / జీవితభాగస్వామి పేరు.

పుట్టిన తేదీ లేదా వయస్సు.

లింగం (Gender).

మొబైల్ నంబర్.

ప్రస్తుత నివాస చిరునామా.

ఫారమ్‌లో ముందుగానే ముద్రించిన వివరాలన్నీ సరిగ్గా ఉన్నాయో లేదో చూసుకోవాలి.

ఏదైనా తప్పుడు సమాచారం ఉంటే దానిని సరిచేయాలి.

చివరగా, డిక్లరేషన్‌పై సంతకం చేసి బూత్ స్థాయి అధికారికి సమర్పించాలి.

ఫారమ్ సమర్పించిన తర్వాత …ఓటర్లు అందించిన సమాచారాన్ని బీఎల్ఓలు క్షేత్రస్థాయిలో ధృవీకరిస్తారు.ఆ సమాచారాన్ని ‘బీఎల్ఓ యాప్’ ద్వారా ఆన్‌లైన్‌లో అప్‌లోడ్ చేస్తారు.దీని ఆధారంగా జూలై 31, 2026 న డ్రాఫ్ట్ ఓటర్ జాబితా ప్రచురించబడుతుంది.ఈ జాబితాపై అభ్యంతరాలు లేదా కొత్త దరఖాస్తులను ఆగస్టు 30, 2026 వరకు సమర్పించవచ్చు. అన్ని సవరణల అనంతరం అక్టోబర్ 1, 2026 న ‘తుది ఓటర్ల జాబితా’ విడుదలవుతుంది.

Also Read:సర్దార్ 2 వర్సెస్ రణబలి!

నిర్ణీత గడువులోగా మీ బూత్ స్థాయి అధికారి మీ ఇంటికి రాకపోతే ఓటర్లు ఈ క్రింది చర్యలు తీసుకోవచ్చు:

మీ ప్రాంత పరిధిలోని స్థానిక బీఎల్ఓ (BLO) ను సంప్రదించండి.

సంబంధిత నియోజకవర్గ ఓటర్ల నమోదు అధికారిని (ERO) కలవండి.

తెలంగాణ చీఫ్ ఎలక్టోరల్ ఆఫీసర్ అధికారిక వెబ్‌సైట్‌ను సందర్శించండి.

ఆన్‌లైన్ ఓటర్ సర్వీసెస్ పోర్టల్‌లో ఈ ఫారమ్ అందుబాటులోకి వచ్చినప్పుడు ఆన్‌లైన్ ద్వారానే సమర్పించండి.

చివరి తేదీ వరకు వేచి చూడకుండా, వీలైనంత త్వరగా ఈ ప్రక్రియను పూర్తి చేయాలని అధికారులు సూచిస్తున్నారు.

ముఖ్య గమనిక: ఓటర్ల జాబితాలో ఇప్పటికే పేరు ఉన్న పాత ఓటర్లు కూడా ఈ ఎన్యుమరేషన్ ఫారమ్‌ను కచ్చితంగా సమర్పించాల్సి ఉంటుంది. తెలంగాణవ్యాప్తంగా ఓటర్ల రికార్డులను అత్యంత ఖచ్చితత్వంతో నిర్వహించేందుకు ఎన్నికల సంఘం ఈ నిబంధనను తప్పనిసరి చేసింది.