చైనా సంచలనం..’దోమ’ సైజు డ్రోన్లు!

టెక్నాలజీలో చైనా అద్భుతం సృష్టిస్తోంది. చైనాకు చెందిన నేషనల్ యూనివర్శిటీ ఆఫ్ డిఫెన్స్ టెక్నాలజీ (NUDT) శాస్త్రవేత్తలు సైనిక అవసరాల కోసం అత్యంత చిన్నదైన దోమ పరిమాణంలో ఉండే మైక్రో డ్రోన్‌ను అభివృద్ధి చేశారు. శత్రువుల కంటికి కనబడకుండా రహస్యంగా యుద్ధభూమిలో నిఘా పెట్టడానికి, సమాచారాన్ని సేకరించడానికి ఈ సూక్ష్మ డ్రోన్ ఉపయోగపడనుంది.

చైనాలోని హునాన్ ప్రావిన్స్‌లో ఉన్న NUDT రోబోటిక్స్ లాబొరేటరీ ఈ ప్రాజెక్ట్‌ను రూపొందించింది. చైనా అధికారిక సైనిక టెలివిజన్ ఛానల్ ‘CCTV 7’ ప్రసారం చేసిన ఒక ప్రత్యేక నివేదికలో ఈ విషయాన్ని వెల్లడించారు. ఈ కార్యక్రమంలో హ్యూమనాయిడ్ రోబోలతో పాటు, కంటికి కూడా సరిగ్గా కనిపించనంత చిన్నగా ఉండే ఈ మైక్రో డ్రోన్‌లను ప్రదర్శించారు.

ఈ మైక్రో రోబోట్ చూడటానికి హూబహూ ఒక దోమలాగే ఉంటుంది. దీనికి ఒక సన్నని పొడవాటి శరీరం, రెండు చిన్న ఆకు ఆకారపు రెక్కలు, మరియు వెంట్రుకలంత సన్నటి మూడు కాళ్లు ఉన్నాయి. పరిశోధకులు దీనికి సంబంధించిన మరో ప్రోటోటైప్‌ను కూడా ప్రదర్శించారు. దీనికి నాలుగు రెక్కలు ఉండగా, దీనిని కేవలం ఒక స్మార్ట్‌ఫోన్ ద్వారా నియంత్రించవచ్చు. ఈ డ్రోన్ ఎంత చిన్నదంటే, దీనిని మన రెండు వేళ్ల మధ్య సులువుగా పట్టుకోవచ్చు.

NUDT విద్యార్థి లియాంగ్ హెక్సియాంగ్ తెలిపిన వివరాల ప్రకారం.. యుద్ధభూమిలో శత్రువుల కదలికలను రహస్యంగా గమనించడానికి ఈ దోమ రోబోట్‌ను ప్రత్యేకంగా డిజైన్ చేశారు. దీని పరిమాణం చాలా చిన్నది కావడంతో, పెద్ద డ్రోన్లు వెళ్లలేని అత్యంత సున్నితమైన మరియు కఠినమైన ప్రదేశాల్లోకి కూడా ఇది ఎవరికీ దొరకకుండా వెళ్ళి సమాచారాన్ని సేకరించగలదు.

ఇలాంటి సూక్ష్మ పరిమాణంలో డ్రోన్‌ను నిర్మించడం అనేది ఇంజనీరింగ్ రంగంలో ఒక పెద్ద సవాలు. ఎందుకంటే, ఇంత చిన్న స్థలంలోనే సెన్సార్లు, బ్యాటరీలు, కంట్రోల్ సర్క్యూట్లు మరియు కమ్యూనికేషన్ సిస్టమ్స్ వంటి అత్యంత కీలకమైన భాగాలన్నింటినీ అమర్చాల్సి ఉంటుంది. దీనికోసం మైక్రో-ఇంజనీరింగ్, మెటీరియల్స్ సైన్స్ మరియు బయోనిక్స్ వంటి పలు రంగాల నిపుణులు కలిసి పనిచేయాల్సి వచ్చింది.

Also Read:చిరంజీవి-చరణ్..సంచలనం!

కేవలం చైనా మాత్రమే కాకుండా ఇతర దేశాలు కూడా ఈ సాంకేతికతపై పనిచేస్తున్నాయి.చైనా దీనిని సైనిక అవసరాల కోసం తయారు చేసినప్పటికీ, భవిష్యత్తులో ఈ మైక్రో-రోబోటిక్స్ టెక్నాలజీ పౌర సేవల కోసం కూడా ఎంతగానో ఉపయోగపడనుంది. వైద్య రంగంలో మానవ శరీరంలోకి పంపి నిర్దేశిత ప్రాంతానికి ఔషధాలను చేరవేయడానికి చిన్నపాటి శస్త్రచికిత్సలకు, వ్యాధి నిర్ధారణ పరీక్షలకు ఇవి ఉపయోగపడతాయి. అలాగే పర్యావరణ పర్యవేక్షణ, వ్యవసాయ పరిశోధనల్లో కూడా వీటిని వాడవచ్చు.