అరుణాచల్ ప్రదేశ్లోని లాంగ్డింగ్ జిల్లాలో ఒక అరుదైన పసుపు రంగు పఫ్బాల్ పుట్టగొడుగును ఐసిఎఆర్-కృషి విజ్ఞాన కేంద్రం బృందం గుర్తించింది. ఇది బోవిస్టా కలరాటా జాతికి చెందినదిగా భావిస్తున్నారు. జూన్ 4న లాంగ్డింగ్ జిల్లాలోని జెడువా గ్రామానికి వెళ్లిన కేవీకే బృందం ఈ అరుదైన పుట్టగొడుగును కనుగొన్నట్లు అధికారులు వెల్లడించారు.
దీని విలక్షణమైన పసుపు రంగు, గుండ్రని ఆకారం ఆధారంగా లాంగ్డింగ్ కేవీకే ప్లాంట్ పాథాలజీ నిపుణులు డాక్టర్ దీప్ నారాయణ్ మిశ్రా దీనిని ప్రాథమికంగా గుర్తించారు. అయితే, దీనిని ఖచ్చితంగా ధృవీకరించడానికి వివరణాత్మక మైక్రోస్కోపిక్ పరీక్షలు, మాలిక్యులర్ క్యారెక్టరైజేషన్ (డీఎన్ఏ పరీక్షలు) అవసరమని శాస్త్రవేత్తలు స్పష్టం చేశారు.
లాంగ్డింగ్ జిల్లాలో ‘బోవిస్టా కలరాటా’ జాతి లభ్యతకు సంబంధించి గతంలో ఎలాంటి ఆధారాలు లేవు. ఒకవేళ ఇది అధికారికంగా ఖరారైతే ప్రపంచంలోనే అత్యంత కీలకమైన తూర్పు హిమాలయ జీవవైవిధ్య హాట్స్పాట్లో ఉన్న అరుణాచల్ ప్రదేశ్ జీవవైవిధ్య జాబితాలో మరో మైలురాయిగా నిలుస్తుంది.
సాధారణ పుట్టగొడుగుల్లా వీటికి కింద ఈకల వంటి నిర్మాణాలు ఉండవు. పఫ్బాల్ శిలీంధ్రాలు తమ గుండ్రని ఆకారంలో ఉన్న మూసివున్న బాడీ లోపల మిలియన్ల కొద్దీ సూక్ష్మ సిద్ధబీజాలను ఉత్పత్తి చేస్తాయి. ఇవి పరిపక్వం చెందినప్పుడు గాలి, వర్షం లేదా ఇతర కదలికల ద్వారా పొడి రూపంలో బయటకు వచ్చి చుట్టుపక్కల ప్రాంతాలకు విస్తరిస్తాయి. ఇవి చనిపోయిన వృక్ష వ్యర్థాలను కుళ్ళింపజేయడం ద్వారా నేలలో పోషకాల పునరుత్పత్తికి, కర్బన వలయానికి ఎంతో సహాయపడతాయి.
Also Read:టీఎంసీపై అధిర్ రంజన్ ఫైర్
పలు పఫ్బాల్ జాతులలో ప్రొటీన్లు, పీచుపదార్థం ,అవశ్యక అమినో ఆమ్లాలు, ఖనిజాలు మరియు యాంటీఆక్సిడెంట్లు పుష్కలంగా ఉంటాయని శాస్త్రవేత్తలు తెలిపారు. అంతేకాకుండా వీటిలో ఉండే బయోయాక్టివ్ మెటాబోలైట్స్ రోగనిరోధక, యాంటీ ఇన్ఫ్లమేటరీ లక్షణాలను కలిగి ఉండి, ఔషధాల తయారీకి ఉపయోగపడతాయని అధ్యయనాలు సూచిస్తున్నాయి.