బీహార్ రాజకీయ ముఖచిత్రం మరోసారి అనూహ్య మలుపు తిరిగింది. సుదీర్ఘ కాలం పాటు ముఖ్యమంత్రిగా పనిచేసిన నితీశ్ కుమార్ తన పదవికి రాజీనామా చేయాలని నిర్ణయించుకున్నట్లు తెలుస్తోంది. ఈ క్రమంలో బీహార్ కొత్త ముఖ్యమంత్రిగా బీజేపీ రాష్ట్ర అధ్యక్షుడు సామ్రాట్ చౌదరి పగ్గాలు చేపట్టబోతున్నారనే వార్తలు రాజకీయ వర్గాల్లో సంచలనం సృష్టిస్తున్నాయి.
బీహార్ చరిత్రలో బీజేపీకి చెందిన నాయకుడు ముఖ్యమంత్రి కావడం ఇదే తొలిసారి కానుంది. ఇప్పటివరకు నితీశ్ కుమార్కు మద్దతుదారుగా లేదా సంకీర్ణ భాగస్వామిగా ఉన్న బీజేపీ, ఈసారి రాష్ట్ర పాలనా పగ్గాలను నేరుగా తన చేతుల్లోకి తీసుకోవాలని నిర్ణయించినట్లు కనిపిస్తోంది.
ప్రస్తుత ముఖ్యమంత్రి నితీశ్ కుమార్ త్వరలోనే జరగబోయే మంత్రివర్గ సమావేశంలో తన రాజీనామా నిర్ణయాన్ని అధికారికంగా ప్రకటించనున్నారు. బీజేపీ అధిష్టానం సామ్రాట్ చౌదరి పేరును ముఖ్యమంత్రి అభ్యర్థిగా ఇప్పటికే దాదాపు ఖరారు చేసింది.బీజేపీ శాసనసభా పక్ష సమావేశం ముగిసిన వెంటనే ఆయన పేరును అధికారికంగా ప్రకటించనున్నారు.
అన్నీ అనుకున్నట్లు జరిగితే, రేపు (బుధవారం) సామ్రాట్ చౌదరి బీహార్ నూతన ముఖ్యమంత్రిగా ప్రమాణ స్వీకారం చేసే అవకాశం ఉంది.సామ్రాట్ చౌదరి బీహార్ రాజకీయాల్లో కీలక నేతగా గుర్తింపు పొందారు. ప్రస్తుతం ఆయన బీహార్ బీజేపీ అధ్యక్షుడిగా కొనసాగుతున్నారు. దూకుడుగా వ్యవహరించే నాయకుడిగా పేరున్న ఆయన, వెనుకబడిన తరగతుల (OBC) ఓటు బ్యాంకును ఆకర్షించడంలో సిద్ధహస్తులు. గతంలో ఆయన ఉప ముఖ్యమంత్రిగా మరియు వివిధ శాఖల మంత్రిగా పనిచేసిన అనుభవం ఉంది.
Also Read:‘డెకాయిట్’..మంచి సినిమా తీశాం!
నితీశ్ కుమార్ వైదొలగడం మరియు బీజేపీ స్వయంగా ప్రభుత్వాన్ని నడిపించడం అనేది హిందీ రాష్ట్రాల్లో ఆ పార్టీ పట్టును మరింత బలపరుస్తుందని విశ్లేషకులు భావిస్తున్నారు.