అధికంగా నీళ్లు తాగడం కూడా ప్రమాదకరమవుతుందని వైద్యులు హెచ్చరిస్తున్నారు. శరీరానికి నీరు ఎంతో అవసరం అయినప్పటికీ, అతిగా తాగితే “వాటర్ ఇంటాక్సికేషన్” అనే సమస్య తలెత్తే ప్రమాదం ఉందని నిపుణులు చెబుతున్నారు.
ప్రతిరోజూ అందరూ ఒకే స్థాయిలో నీళ్లు తాగాలి అనే నిబంధన సరైంది కాదని వైద్యులు అంటున్నారు. ప్రతి వ్యక్తి శరీర అవసరాలు వేరు. కొందరికి రోజుకు 2-3 గ్లాసులు సరిపోతే, మరికొందరికి ఎక్కువ అవసరం ఉండవచ్చు. కిడ్నీలు శరీరంలో ద్రవ సమతుల్యతను నియంత్రిస్తూ అదనపు నీటిని బయటకు పంపిస్తాయి.
శరీరం తట్టుకోలేని స్థాయిలో నీళ్లు తాగినప్పుడు రక్తంలోని సోడియం స్థాయి తగ్గిపోతుంది. దీనిని హైపోనాట్రీమియా అంటారు. సోడియం తగ్గిపోవడం వల్ల మెదడు పనితీరుపై ప్రభావం పడుతుంది. వికారం, తలనొప్పి, గందరగోళం, వాపు వంటి లక్షణాలు కనిపించవచ్చు. తీవ్రమైన పరిస్థితుల్లో ఫిట్స్ కూడా రావచ్చు.
కిడ్నీలు శరీరానికి ఎంత నీరు అవసరమో నిర్ణయిస్తాయి. కిడ్నీ పనితీరు తగ్గితే, నీరు బయటకు పంపే సామర్థ్యం కూడా తగ్గుతుంది. అందువల్ల కిడ్నీ సమస్యలు ఉన్నవారు నీళ్లు ఎంత తాగాలో వైద్యుల సూచనల ప్రకారం నిర్ణయించుకోవాలి. ఎక్కువ నీళ్లు తాగితే శరీరంలోని విషపదార్థాలు పూర్తిగా తొలగిపోతాయని అనుకోవడం అపోహ మాత్రమే. నీళ్లు కిడ్నీల పనితీరుకు సహాయపడతాయి కానీ కిడ్నీ సమస్యలను పూర్తిగా నయం చేయలేవు.
Also Read:రోజూ తినే ఈ స్నాక్స్తో మీ ఆరోగ్యం ఖతం!
కేవలం కిడ్నీ రోగులకే కాదు, ఆరోగ్యంగా ఉన్నవారు కూడా అతిగా నీళ్లు తాగితే సమస్యలు రావచ్చు. ఒకేసారి ఎక్కువ నీళ్లు తాగడం లేదా రోజుకు 7-8 లీటర్లకు మించి తాగడం వల్ల శరీర సమతుల్యత దెబ్బతింటుంది. సాధారణంగా ఆరోగ్యవంతులైన పెద్దలకు రోజుకు 2-3 లీటర్ల ద్రవాలు (ఆహారంతో సహా) సరిపోతాయి. అయితే అసలు నియమం ఏమిటంటే—దాహం వేసినప్పుడు తాగడం. వాతావరణం, శారీరక శ్రమ, ఆరోగ్య పరిస్థితుల ఆధారంగా నీటి పరిమాణాన్ని మార్చుకోవాలి. అందుకే నీరు అవసరం కానీ అతిగా తాగడం మంచిది కాదు.