మూసీ నది ఒడ్డున గాంధీ విగ్రహం ఏర్పాటు చేయాలనే ప్రతిపాదనను తీవ్రంగా వ్యతిరేకించారు గాంధీ మునిమనవడు తుషార్ గాంధీ. ప్రజల ఇళ్లను కూల్చివేసి విగ్రహం ఏర్పాటు చేయడం మహాత్మా గాంధీ సిద్ధాంతాలకు పూర్తిగా విరుద్ధమని ఆయన అభిప్రాయపడ్డారు. గాంధీ గారు ఎప్పుడూ పేదల పక్షాన నిలబడ్డారని, వారి ఇబ్బందులపై సున్నితంగా స్పందించేవారని గుర్తుచేశారు.
మూసీ నది ఒడ్డున విగ్రహ నిర్మాణం పేరుతో స్థానిక ప్రజలను ఇళ్ల నుంచి ఖాళీ చేయించడం, జీవనాధారాలను దెబ్బతీయడం సరైంది కాదన్నారు. గాంధీ గారు బ్రతికి ఉన్నా తన పేరుతో ఇలాంటి చర్యలు చేపట్టొద్దని స్పష్టంగా చెప్పేవారని వ్యాఖ్యానించారు. గాంధీ పేరు ప్రజల సంక్షేమానికి ప్రతీకగా ఉండాలని, ఇబ్బందులకు కారణంగా మారకూడదని సూచించారు.
ఈ విషయంపై తెలంగాణ ముఖ్యమంత్రి రేవంత్ రెడ్డిని తుషార్ గాంధీ ప్రత్యేకంగా కోరారు. ప్రజల మనోభావాలను గౌరవించి, ఇళ్ల కూల్చివేత వంటి చర్యలను నిలిపివేయాలని విజ్ఞప్తి చేశారు. అభివృద్ధి పేరుతో సామాన్య ప్రజలు నష్టపోకూడదని, గాంధీ సిద్ధాంతాలు సమాజంలో శాంతి, సమానత్వం, న్యాయం నెలకొల్పడానికే అన్న విషయాన్ని గుర్తుంచుకోవాలని ఆయన అన్నారు.
