టెలికం రంగంలో సునామీలా దూసుకువచ్చిన రిలయన్స్ జియో, ముందుగా అన్ని టెలికం సేవలను ఉచితంగా ప్రకటించి, అందరిని ఆశ్చర్యచకితుల్ని చేసిన విషయం తెలిసిందే. జియో కస్టమర్లను ఆఫర్‌లతో ఆకట్టుకుంటుంది. తాజాగా వినియోగదారుల కోసం మరో ఆఫర్‌ను ప్రకటించింది.
ఇకపై సన్ గ్రూప్‌కు చెందిన సన్ నెక్ట్స్ ప్లాట్‌ఫాంలోని కంటెంట్‌ను జియో సినిమా యాప్‌లో జియో వినియోగదారులు ఉచితంగా వీక్షించవచ్చు. ఈ మేరకు జియో, సన్ గ్రూప్ కంపెనీలు ఒప్పందం చేసుకున్నాయి. ఈ క్రమంలో సదరు కంటెంట్‌ను జియో వినియోగదారులు తమ ఫోన్‌లోని జియో సినిమా యాప్‌లో వీక్షించవచ్చని జియో తెలిపింది.
కాగా ఇప్పటికే డిస్నీ సంస్థతో చేసుకున్న ఒప్పందం కారణంగా జియో సినిమా యాప్‌లో డిస్నీ కంటెంట్‌ను కూడా చూసేందుకు వీలు కలుగుతోంది. ఈ క్రమంలో జియో సినిమా యాప్ అటు ఎయిర్‌టెల్ ఎక్స్‌స్ట్రీమ్‌తోపాటు వొడాఫోన్ ప్లే యాప్‌లకు గట్టి పోటీనివ్వనుంది.
