విజయ్ దేవరకొండ జోరు మీదున్నాడు. వరసపెట్టి సినిమాలు చేస్తూ హీరోగా తన క్రేజ్‌ను పెంచుకుంటున్నాడు. ‘అర్జున్ రెడ్డి’ సినిమాతో అందరి దృష్టిని తనవైపు తిప్పుకున్న ఈ యంగ్ హీరో.. ‘గీత గోవిందం’ చిత్రంతో తన మార్కెట్ ఏ స్థాయిలో ఉందో నిరూపించాడు. ఇటీవలే ఈ యువ హీరో నోటా సినిమాతో ప్రేక్షకుల ముందుకొచ్చాడు. తాజాగా డియ‌ర్ కామ్రేడ్ చిత్రంతో బిజీగా ఉన్నాడు. ఇక త్వ‌ర‌లో ‘మళ్ళీ మళ్ళీ ఇది రాని రోజు’ ఫెమ్ క్రాంతి మాధవ్ దర్శకత్వంలో సినిమా చేయ‌నున్నాడు.
క్రియేటివ్ కమర్షియల్ పతాకంపై కె.ఎస్. రామారావు సమర్పకుడిగా వ్యవహరించనున్న ఈ చిత్రానికి కె.ఏ వల్లభ నిర్మాత. రాశీఖన్నా, ఐశ్వర్యరాజేష్, బ్రెజిల్ మోడల్ ఇసాబెల్లె డి కథానాయికలుగా నటించనున్నారు. అయితే ఇప్పటి వరకు ఒకే హీరోయిన్‌తో రొమాన్స్ చేస్తూ వస్తోన్న విజయ్ దేవరకొండ ఈ సినిమాలో ఏకంగా ముగ్గురు హీరోయిన్‌లతో రొమాన్స్ చేయనుండడం విశేషం.
ఈ సినిమాలో ముగ్గురు హీరోయిన్లకి , హీరోకి మ‌ధ్య జ‌రిగే సంఘ‌ట‌న‌లు ప్రేక్ష‌కుల‌కి స‌రికొత్త అనుభూతిని అందిస్తుంద‌ని చెబుతున్నారు. న‌వ్య‌పంథాలో సాగ‌నున్న అతని పాత్ర ప్రేక్ష‌కుల‌ని ఎంత‌గానో అలరిస్తుంద‌ట. వరుస విజయాలతో మాంచి ఊపుమీదున్న విజయ్ దేవరకొండకు ఈ సినిమా ఏ మేరకు విజయాన్నందిస్తుందో తెలియాలంటే మరికొన్ని రోజులు వేచి చూడాల్సిందే.
